Kreu i Kuvendit Ilir Meta e ka cilësuar reformën në drejtësi si një domosdoshmëri që duhet të miratohet sa më shpejt. Ai shtoi në një konferencë për drejtësinë të mbajtur në Tiranë, se asnjë reformë nuk është diskutuar kaq gjerë sa reforma në drejtësi.
Sipas Metës, reforma në drejtësi është mjaft komplekse, për shkak se duhen arritur shumë objektiva që sipas tij ndonjëherë nuk shkojnë në mënyrë paralele.
“Është një proces gjithëpërfshirës, ku dallimet janë shumë të mëdha. Për momentin ka një protagonizëm politik kundërvënës shumë të madh për diferenca shumë të vogla. Jemi në momentin e finalizimit të miratimit të ndryshimeve kushtetuese që do i hapin rrugë reformës. Jam i bindur se baza e konsensusit është shumë më e gjerë se sa diferencat që janë pretekste. Më shumë se 90% e çështjeve janë të dakordësuara, megjithëse ka edhe çështje të cilat palët mund ti lexojnë ndryshe, por në politikë jemi”, tha Meta.
Në këtë drejtim nënvizoi se në rast kur nuk arrihet konsensusi duhet të pranohen rekomandimet e misioneve EURALIUS dhe OPDAT, por sipas tij është domosdoshmëri që të miratohen ndryshimet kushtetuese në javët në vijim dhe jo në muajt e ardhshëm. Meta tha se në rast se miratimi i ndryshimeve shtyhet, axhenda e integrimit pengohet, por edhe pse zgjedhjet afrojnë, dallimet politike bëhen më të forta./tesheshi.com/
