Ambasadori i Shteteve të Bashkuara të Amerikës në Shqipëri, Donald Lu ka vijuar edhe gjatë ditës së sotme me kritikat e tij në drejtim të sistemit të drejtësisë. Në aktivitetin me temë “Reforma në drejtësi dhe të drejtat e grave, Lu u shpreh se të pasurit dhe të fortët e blejnë drejtësinë, ndërsa të varfrit janë viktima.
“Në një sistem të korruptuar, viktimat janë shpesh gra. Të pasurit dhe të fortët e blejnë drejtësinë, ndërsa të varfrit janë viktima. Sa nga ne kanë dëgjuar histori të tilla, sa herë u hiqet e drejta grave nga disa gjyqtarë të korruptuar dhe të paaftë”, u shpreh Lu.
Ambasadori amerikan tha se reforma në drejtësi jep një mundësi për të pastruar sistemin gjyqësor dhe për të rikthyer besimin. Sipas tij, propozimi i tanishëm i reformës duhet të përfshijë ndryshime të rëndësishme për të reflektuar ide më të mira nga Komisioni i Venecias, ekspertët e opozitës, gjyqtarët, prokurorët, juristët dhe publiku i ndërgjegjshëm dhe se procesi ka nisur.
Në vijim Lu tha se ekspertët amerikanë u përfshinë aktivisht në forcimin e ndryshimeve kushtetuese, por se ndryshe nga propozimet e mëparshme ky propozim ofron një mekanizëm për të larguar gjyqtarët e prokurorët e korruptuar dhe të paaftë./tesheshi.com/
