Ambasada amerikane në Tiranë i ka bërë një përshkrim me pak fjalë dhe gjithsesi retorik, Reformës në Drejtësi, e diskutueshme dhe nga jo gjykime politike mbi suksesin e deritanishëm të saj.
Vetë amerikanët, aksionaret kryesorë të saj, e pranojnë se ajo s’është e mundur të jetë e përsosur, as e lehtë, as e shpejtë.
Në një takim dedikur kësaj reforme, mbajtur në selinë e ambasadës, me aktorë të drejtpërdrejtë të saj, si dhe figura publike të debatit politik, u përcoll pikërisht ky mesazh.
Duhet kujtuar se Reforma në Drejtësi ka nxjerrë nga sistemi dhe figura me integritet professional, të cilëve iu kaput kleçka të para 25 viteve në pasuri, pa asnjë tregues korrupsioni, ndër anët më të diskutueshme të saj. Ndërkohë, çoroditi e ashpërsoi dhe politikën, por jo për faj të saj.
Postimi i plotë i ambasadës:
“Me mbylljen e vitit 2021, Ambasada e Shteteve të Bashkuara në Tiranë hedh një vështrim mbi progresin që ka bërë Shqipëria gjatë pesë viteve të para të Reformës në Drejtësi.
Progresi nuk duhet të matet vetëm nga distanca deri në destinacion, progresi duhet të matet edhe nga sa larg kemi arritur në udhëtim.
Paketa legjislative, duke përfshirë ndryshime të rëndësishme kushtetuese, shënoi një pikënisje për matjen e këtij progresi.
Si një reformë gjithëpërfshirëse, Shqipëria zgjodhi të ndërmerrte një plan tërësor për të rivlerësuar integritetin dhe profesionalizmin e anëtarëve të sistemit të drejtësisë dhe promovimin e një kulture të re nëpërmjet ndryshimit të strukturës së institucioneve të drejtësisë nëpërmjet depolitizimit dhe decentralizimit.
Përfaqësuesit e Ambasadës së ShBA u mblodhën së fundmi me disa nga individët e shumtë që punojnë pa u lodhur, çdo ditë, për të zbatuar këto koncepte dhe për ta bërë Reformën në Drejtësi një sukses.
Reforma në Drejtësi nuk është e lehtë, e shpejtë apo e përsosur dhe Ambasada e Shteteve të Bashkuara është mirënjohëse për ata që e kanë sjellë Shqipërinë deri këtu”. /tesheshi.com/
