Dikur ishte krejt normale, sot është e paimagjinueshme: të pish ujë nga çesma. Për arsye psikologjike apo organike, kjo e vështirë të thuhet, por fakt është se uji në çesma konsiderohet i papijshëm, edhe pse me atë lahen enët, ose dhe gatuhet, gjithashtu edhe pse zyrtarisht cilësohet “i pijshëm”.
Për ministren Balluku, e cila ka iniciuar një reformë në sektorin e trashëguar me superabuzime dhe me gropa të rënda financiare, atë të Ujit, reforma e nisur do synojë jo vetëm shërimin financiar prej një mirëmenaxhimi të ujit dhe burimeve të tij, por dhe kthimin e pijshmërisë së tij në çesmat e shtëpive, pa qenë nevoja për ta blerë me patjetër.
Këtë synim ajo e shpalosi në nënshkrimin e marrëveshjes me bashkitë e qarkut Dibër dhe Kukës për krijimin e dy shoqërive të reja të Ujësjellës-Kanalizimeve.
Aty, Balluku deklaroi se reforma e ujit ishte e domosdoshme dhe shoqëritë e reja që do të krijohen duhet t’u garantojnë qytetarëve 24 orë ujë të pijshëm.
“Sepse quhet ‘ujë i pijshëm’, kështu që nga çdo rubinet duhet të dalë ujë që konsumohet(pra pihet)”, tha ministrja e linjës, duke iu drejtuar kryebashkiakëve të pranishëm, me porosinë që ky shërbim duhet të jetë maksimal në sasi dhe cilësi.
Nga 61 ujësjellës që ndodhen në 61 bashki të vendit do të kalohet me 15 ujësjellës qendrorë, të cilët do të mirëmenaxhojnë financat dhe burimet natyrore nën mbikëqyrje, sqaroi ministrja Balluku.
Sipas saj, brenda vitit 2022 priten rezultate konkrete nga reformimi i ujësjellësve, siç theksoi ajo, “për t’i dalë mbanë një procesi shumë të vështirë në një vend që e ka bekuar Zoti me burime natyrore-ujore si askush tjetër në Europë”. /tesheshi.com/
