Reflekton Panariti, nesër vaksina falas kundër “dermatozës nodulare”

Reflekton ministria e Bujqësisë, pak ditë pas thirrjes së opozitës për vaksinimin e 50 mijë bagëtive të prekura nga sëmundja “dermatoza nodulare”. Që nga dita e nesërme, specialistët do të dalin në terren për të nisur proçesin e vaksinimit, në zonat rurale ku janë infektuar kafshët shtëpiake. Lajmi u bë publik nga vetë ministri i Bujqësisë, Edmond Panariti në një konferencë për shtyp. Ai tha se vaksina do të jetë falas, por ka funksion vetëm parandalues.

“E gjithë sasia e vaksinës ndaj Dermatozës Nodulare, tashmë është siguruar. Duke filluar nga nesër, nis vaksinimi në të gjithë vendin”, deklaroi Panariti, duke theksuar se, “i gjithë procesi do të mbikqyret nga Drejtoritë e Bujqësisë dhe Shërbimi veterinar”.

Më tej, ministri deklaroi se, “vaksinat do të jenë falas për të gjithë fermerët, por së pari do të nisë edhe regjistrimi, identifikimi i kafshëve që nuk janë të matrikulluara. Kafshët do të vaksinohen sipas kritereve shumë rigoroze. Do të mbahet dokumentacion i rregullt, rigoroz, për garantimin e gjithë gjurmueshmërisë së procesit, ku do të firmosin dhe fermerët”.

Në deklaratë Panariti tha se, vaksina është për parandalimin e sëmundjes së gjedhit dhe nuk është profilaksi, që shëron kafshët e prekura.

“Fermerët duhet të jenë edhe vetë të kujdesshëm, duke filluar që na higjiena e kafshëve të tyre, me qëllim parandalimin e përhapjes së sëmundjes. Vaksinat shërbejnë për kafshët e paprekura, ndërsa ato që tashmë janë prekur, vetëm mjekohen dhe pavarësisht punës tonë, të shërbimeve veterinare, fermerët duhet të kujdesen edhe vetë për kafshët e tyre të sëmura”, deklaroi ministri.

I pyetur në lidhje me numrin e kafshëve të ngordhura dhe kompensimin e tyre, ministri deklaroi se, që kur u shfaq kjo sëmundje e deri tani, janë rreth 900 kafshë të ngordhura, për të cilat Ministria e Bujqësisë ka kërkuar një fond shtesë nga qeveria në buxhetin e 2017, ose nga Fondi i Emergjencave, për kompensimin e tyre, po me kafshë të gjalla, raca të përzgjedhura.

Disa ditë më parë, kreu i opozitës, Lulzim Basha gjatë një takimi  me fermerët i bëri thirrje qeverisë dhe instancave përgjegjëse për të shpërndarë vaksinat për bagëtitë e prekur nga sëmundja e gjedhit, pasi sipas tij, pasojat janë të mëdha në ekonomitë e tyre./tesheshi.com/