Me marrëveshjen për Greqinë, sipas kreut të Komisionit Europian, Jean-Claude Juncker “u shmang më e keqja, dhe e shmangëm jo për shkak se ishim veçanërisht të mençur, por sepse kishim frikë. Ishte frika që na lejoi të arrinim marrëveshje”.
Këto janë fjalët e Juncker në një reflektim për gazetën “Leading European Newspaper Alliance (LENA).
Mbi këtë pikë, shton ai, sikundër edhe për emigracionin, kam konstatuar një bllokim, që deri në atë moment ishte virtual, të lidhjeve të solidaritetit në Europë.
“Dal nga kjo eksperiencë i kënaqur, por jo i lumtur. Dal shumë I shqetësuar për të ardhmen”, shton Juncker.
Kreu i Komisionit Europian shpreh shqetësim edhe për ndjenjat antigreke dhe antigjermane që ka sjellë kriza. “Kam frikë nga ndjenjat që kanë hyrë në Europë dhe kam frikë se reagimet e provokuara nga kjo zgjidhje mund t’i mbajnë të larta temperaturat në kontinent. Kam vënë re në shumë vende një zemërim kundër grekëve që shpjegohet me motive të politikës së brendshme dhe që limitohet në të parit vetëm aspektin ekonomik të gjërave”, thotë Juncker.
Reflektimet e kreut të KE-së përfshijnë edhe kryeministrin grek, Aleksis Cipras. “Cipras u bë një burrë i vërtetë shteti në momentin që kuptoi se po të kishte shkuar deri në fund, për Greqinë do të kishte mbërritur katastrofa”.
Por sa kohë do të zgjasë kjo marrëveshje? “Nëse Greqia do të përmbushë kushtet, nuk do të kemi probleme për tre vjetët e ardhshëm”. /tesheshi/
