Të rrallë mund të kenë qenë ata shqiptarë që, duke ndjekur protestën e opozitës dhe ca skena të atyshme të kategorizuar si “dhunë”, të mos ketë patur në kokë dhe skenat e 21 janarit, si përngjasime të njëra-tjetrës.
Jo pjesën tragjike të viktimave. Ajo është unike. Por atë dhunës. Dhe, çfarë ofroi opozita sot në protestë, e më pas mazhoranca me deklarata, tregoi dhe njëherë siamezllëkun e tyre në sjellje politike.
Mazhoranca kishte rastin sot që të përfitonte ca kredite morale, duke thënë në fund se ja, dhunë pati, por as dhe një protestues nuk u gërvish, e jo më të vritej apo merrej zhganazi nga policia e çohej në komisarit.
Por reagimet e shefit të qeverisë Rama duke e bërë fërtele opozitën me një pasuri metaforash, epitetet e Braçes si “barbarë” dhe mesazhi i Ballës për t’i ndëshkuar ligjërisht dëmtuesit e pronës publike, ishin një vetëakuzë e panevojshme.
Kush i ka lexuar, nuk ka se si të mos ketë psherrëtirë dhimbshëm nga ky standart i dyfishtë i promovuar nga përfaqsuesit e opozitës së djeshme, që paçka viktimave, nuk dihet nëse i kanë paguar kostot e dëmeve në kryeministri e jashtë saj më 21 janar, deri tek shlyerja e asaj A6-ës së djegur tek shkallët e Piramidës.
Nga ana tjetër, opozita kishte rastin që sot t’i tregonte opinionit se vërtet ishte e djathtë deri në fisnikëri, e se nuk kishte si t’i ngjante së majtës në dhunën e saj genetike.
Por përkundër kësaj, ajo na konfirmoi po atë, siamezllëkun politik me të majtën.
Diferenca u bë vetëm në viktima, ku mungesa e tyre, qoftë dhe e një të ndaluari, ishte një autogol për PD-në.
Po të shihet me vëmendje, post-protesta nuk po përcjell simetri ngjarjesh. Gjithçka është e përqëndruar tek gjurmët e dhunës, ndërsa nga ana e pushtetit mungojnë detaje kundrapeshe.
Po ashtu, edhe reagimi i ambasadës amerikane është detyruar të ketë një kahje dhe jo të jetë në balancë, gjë që mund të ketë kosto ditët e ardhshme për opozitën.
Kjo është ana politike e çështjes. Moralisht, të dy kahjet sot denoncuan vetveten duke thënë me akte, sjellje e fjalë: “ne jemi si vëllezërit siamezë”! /tesheshi.com/
