Ndërsa disa instanca ndërkombëtare janë angazhuar në denoncimin e atyre që ata i konsiderojnë manipulime në zgjedhjet referendare të së dielës në Turqi, liderë të njohur botërorë po i përcjellin urimet kreut të Presidencës turke, Rexhep Tajip Erdogan.
I pari ishte Presidenti Trump, pasuar nga Putin, ndërkohë që vargut të udhëheqësisë botërore i është shtuar dhe shefi i ekzekutivit shqiptar, i njohur si i mik i afërt i liderit turk.
Sipas një njoftimi të Anadoly Agency, Rama i ka telefonuar Erdoganit të martën në mbrëmje për t’i uruar fitoren e referendumit, pas së cilit Turqia kalon nga republikë parlamentare në republikë presidenciale.
Ndërkohë, akuzave që i janë bërë se me anë të kësaj lëvizjeje ai po rrëshqet drejt të qënit një diktator, Erdogan iu është përgjigjur në një mënyrë tejet origjinale.
“Unë jam i vdekshëm, mund të vdes në çdo moment. Në këto kushte, a është e mundshme që të krijosh një sistem për një qënie të vdekshme që mund të vdesë në çdo moment? Ky sistem përfaqëson një ndryshim, një transformim në historinë demokratike të Turqisë. Për 14 apo 15 vite, krikët e kanë përdorur fjalën diktator ndaj meje. Që të ekzistojë një diktaturë, jo domosdoshmërisht është e nevojshme që të kesh një sistem presidencial. Më lejoni t’ju them diçka: nëse ata thonë se kutitë e votimi prodhojnë diktatorë, kjo do të ishte e padrejtë jo vetëm për personin e zgjedhor, por në të njëjtën kohë do të ishte fyese edhe për ata që kanë votuar”, ka deklaruar presidenti turk. /tesheshi.com/
