Kryeministri Edi Rama votoi paraditen e sotme në qendrën e votimit në Qesarakë, si anëtar i Partisë Socialiste për konfirmimin e mandatit të kryetarit.
Ai e cilësoi këtë si një një moment shumë i rëndësishëm, sepse siç tha Kryeministri, kjo është hera e parë në këtë histori të re të pluralizmit, që një parti i drejtohet instrumentit të referendumit dhe u jep mundësi të gjithë pjesëtarëve të familjes së saj për të qenë pjesë e një vendimmarrje me rëndësi.
Rama shtoi se Partia Socialiste është rihapur, po zgjerohet dita ditës, po rritet me anëtarë të rinj.
“Përfitoj nga rasti, që duke shfrytëzuar aksesin përmes jush tek çdo pjesëtar i familjes sonë në gjithë Shqipërinë, t’ju bëj thirrje që jo vetëm të marrin pjesë, por njëkohësisht të vazhdojmë të punojmë përditë, për të realizuar objektivin që secili dhe secila të sjellin edhe një tjetër të afërm, në kuptimin e ideve dhe të idealeve për Partinë Socialiste, për Shqipërinë, në familjen tonë politike”, – tha Rama pasi votoi. /tesheshi.com/
