Pas mbajtjes së referendumit të djeshëm për mandatin e kryetarit Partisë Socialiste, sekretari organizativ i PS-së, Blendi Klosi bëri me dije se në total kanë marrë pjesë në referendum 84 % të anëtarëve të PS-së dhe se 94.9 % të tyre kanë votuar “PO”, pra për rinovimin e mandatit të kryetarit aktual.
Nga ana tjetër, deputeti socialist Ben Blushi vuri në pikëpyetje rezultatin e referendumit, duke u shprehur se ishin vartësit e Ramës ata që i numëruan votat dhe se nuk dihet se çfarë është bërë me listat e votuesve. Për Blushin nuk dihet nëse kutitë e votimit kanë qenë të sigurta.
“I bindur se Edi Rama kishte frikë nga gara, e lashë vetëm me vartësat e tij të cilët bënë listat, i ndryshuan, i hartuan, i hëngrën dhe i kafshuan sikur të ishin copa dhjami mbi një tryezë të kalbur. Ky referendum ishte në kundërshtim me statutin e PS i cili kërkon që të mbahen zgjedhje për kryetarin e PS një herë në katër vjet. Ky referendum u krye në kundërshtim me Kodin Zgjedhor te PS sipas të cilit referendumet nuk mbahen dy muaj para dhe dy muaj pas Kongresit. Në këtë referendum nuk pati palë, pasi palës që teorikisht e kundërshtonte nuk i njohën fushatën, vëzhguesit, numëruesit dhe kontrollin mbi listat”, – thotë Ben Blushi. /tesheshi.com/
