“Jo”-ja ka dalë fituese në referendumin e zhvilluar në Holandë në lidhje me marrëveshjen e partneritetit midis Bashkimit Europian dhe Ukrainës, çka i heq pengesat tregtare me këtë të fundit.
Me gati të tëra votat të numëruara, rezulton se 61.1 për qind e votuesve janë shprehur kundër marrëveshjes, kurse 38 për qind prej tyre e kanë mbështetur atë.
Geert Wilders, politikani holandez i së djathtës ekstreme, e ka parë rezultatin si fillimin e fundit të BE-së. “Duket sikur populli holandez i tha ‘Jo’ elitës europiane, i tha ‘Jo’ traktatit me Ukrainën. Fillimi i fundit të BE-së.”
Parlamenti holandez e ka ratifikuar tashmë marrëveshjen e BE-së, e rezultati i votimit nuk ka fuqi detyruese. Por kryeministri i vendit, Mark Rutte, ka lënë një dritare të hapur. Nëse pjesëmarrja në votime do të rezultojë më tepër se 30 për qind, qeveria mund ta rimarrë në shqyrtim marrëveshjen.
“Pikëpamja ime është se nëse pjesëmarrja e kalon 30-përqindëshin, me një fitore të tillë të kampit ‘Jo’, ratifikimi nuk mund të bëjë përpara pa diskutime.”
Referendumi u krye pas një peticioni të publikuar në internet e të përpiluar nga aktivistët euroskeptikë, që pati 450.000 nënshkrime.
Presidenti ukrainas, Petro Poroshenko, ka reaguar sot, duke deklaruar se pavarësisht kundërshtisë së dukshme, vendi i tij do të vazhdojë të lëvizë drejt BE-së. Ai e minimizoi rezultatin dhe peshën e referundimit, duke u shprehur njëkohësisht se Ukraina do ta marrë atë në konsideratë. /tesheshi.com/
