Një vendim i mundshëm nga ana e Britanisë për t’u larguar nga Bashkimi Europian do të ishte “helm” për Britaninë e Madhe e ekonominë globale e atë europiane që do të zgjaste me vite. Ministri gjerman i Financave, Wolfgang Schäuble është pozicionuar kështu duke dalë në mbrojtje të anëtarësisë së Britanisë në BE-në e reformuar, ndërkohë që kryebashkiaku i Londrës, Boris Johnson përsëriti se beson se qeveria po përdor “agjentin e frikës” për të minuar votën në favor të Brexit.
Johnson ripërsëriti sulmet e tij mbi rrethanat “skandaloze” në të cilat një biznesmen i fuqishëm dha dorëheqjen nga Dhoma britanike e Tregtisë pasi kishte shprehur një pikëpamje pozitive për mundësitë e Britanisë jashtë Bashkimit Europian.
Komentet “pro” dhe “kundër” a pasojnë një fundjavë fushate të hidhur nga ministrat e kabinetit për disa aspekte të referendumin “jashtë apo brenda BE-së”, që pritet të mbahet në qershor.
Schäuble theksoi në pozicionimin e tij se do të pasonin vite të tëra negociatash nga më të vështirat që do të ishin shumë të vështira edhe për BE-në, ekonominë britanike dhe atë europiane e madje edhe ekonominë botërore.
Në të njëjtin debat me ministrin gjerman, u shfaq edhe kryebashkiaku Johnson, i cili qëndron në krye të fushatës për largimin e Britanisë nga BE. Ai ngriti dyshime përse John Longworth, drejtori i Përgjithshëm i BCC-së, kishte dhënë dorëheqjen nga pozicioni i vet.
“Eshtë shumë e trishtueshme që dikush si John Longworth që ndan të njëjtën pikëpamje me mua, që ka shumë eksperiencë në biznesin britanik dhe në industri, të paguajë një çmim kaq të rëndë pikërisht se ndau pikëvështrimin optimist pro daljes nga BE”, tha Johnson.
Downing Street hodhi poshtë pretendimin se i kishte bërë presion BCC-së për ta pezulluar drejtuesin e saj për shkak të shprehjes së pikëpamjes së vendi do të kishte një të ardhme më të shkëlqyer jashtë Bashkimit Europian.
Por, kryebashkiaku i Londrës ngul këmbë se drejtuesi i BCC-së është bërë viktimë e “projektit frikë” – një etiketim që përdoret për taktikat e David Cameron dhe aleatëve të tij për të siguruar opcionin e mbetjes në BE në referendum.
Fushata për referendumin ka përçarë keqazi Britaninë, ndërsa në debat janë përfshirë figurat kryesore të vendit në politikë, ekonomi dhe jetën sociale. BCC apo dhomat tregtare britanike kanë dalë me qëndrimin pro mbetjes së Britanisë në BE, pasi siç tha një zëdhënës i qeverisë, “60% e anëtarëve të BCC-së thonë se dëshirojnë të qëndrojnë në BE”.
Johnson ndërkaq, përdori një metaforë shumëngjyrëshe për të përshkruar argumentet e atyre që dëshirojnë të mbeten në BE, duke e quajtur këtë kamp mendjengushtë dhe negativ përballë një mundësie që Britania të largohet e të rinisë negociatat me BE-në.
“Eshtë sikur gardiani të ketë lënë aksidentalisht derën e burgut hapur dhe njerëzit të shohin botën e ndriçuar atje jashtë”, tha ai. “Të gjithë papritur nisin të ndjejnë tmerret e botës jashtë. Por në fakt të dalësh do të ishte e mrekullueshme. Do të ishte një peshë e rëndë që do të hiqej nga shpina e biznesit britanik”.
Kjo grindje më e fundit në kuadër të fushatës për referendumin vjen ndërsa Johnson ka bashkuar forcat me sekretarin e Drejtësisë, Michael Gove, në një përpjekje për të rrëzuar pretendimet e përsëritura të kryeministrit se anëtarësia në BE e bën Britaninë më të fortë dhe më të sigurtë. Përgatiti: Juli Prifti – /tesheshi.com/
