Reduktimi i përdorimit të çertifikatave në institucionet është vetëm hapi i parë i uljes së numrit të dokumenteve që kërkojnë sportelet e shtetit për të nisur një proçedurë apo për të dhënë një të tillë.
Tashmë qeveria në mbledhjen e saj të parë ka marrë vendimin për çertifikatat, ndërsa zv.kryeministrja, Senida Mesi, tha se do të ndërmarren hapat e duhur për të ulur në maksimum numrin e dokumenteve që kërkohen për qytetarët dhe bizneset.
“Dy drejtori brenda për brenda një institucioni kërkojnë një dokument të tillë. Kati i parë i kërkon katit të dytë një çertifikatë, por me vendimin e ri të Këshillit të Ministrave, kjo barrë u kalon institucioneve publike. Nëpunësit e administratës publike, nëpërmjet portalit e-Albania, mund të aksesojnë çdo dokumentacion, në lidhje me gjendjen civile dhe ne po punojmë që të kemi sa më pak letra, leje, liçenca dhe dokumente”, tha Mesi.
Zv.kryeministrja do të drejtojë dhe procesin e derregullimit, nga i cili do të dalë dhe struktura e re e drejtorive dhe agjensive shtetërore. Mesi thotë se po studiohen nga çdo ministri sugjerimet e bëra nga grupi i punës së drejtuar nga Niko Peleshi, por ende nuk ka asgjë konkrete për këtë proçes, në përfundim të të cilit shumë drejtori dhe agjensi në varësi të ministrive, do të shkrihen apo bashkohen. /tesheshi.com/
