Edhe dje, deputeti i LSI-së Spartak Braho, nuk e shfaqi një video të paralajmëruar prej tij në gjithë këto ditë. Arsyeja, siç tha ai, është se Berisha nuk i la kohë dhe mundësi për ta bërë një gjë të tillë. Deputeti Braho është bërë emblematik sa i përket prirjes së tij për t`u treguar “padron” i botës okulte të politikës shqiptare, me disponimin gjithnjë të materialeve kompromentuese (kryesisht video), për kundërshtarët politikë. Simbol i gjithë kësaj është një çantë e tij, ku ai thotë se e ka plot me materiale me vlerë denoncuese. Por deri më tani, nga ajo çantë nuk ka dalë ndonjë e tillë. Ndërsa ai, vijon t`ja kujtojë opinionit, sidomos kur politika përfshihet në ndonjë debat të nxehtë si ky i fundit.
Ekuivalent i tij në politikë, që i përket kahjes tjetër, është Berisha. Ky i fundit nuk ka asnjë “çantë” simbolike, nuk premton shfaqje të asnjë videoje, por për çdo rast thotë se disponon “fakte që dëshmojnë se…”, të cilat shoqërohen gjithnjë me premtimin se do i bëjë publike së shpejti. Kjo ndodhi dhe paraditen e së enjtes, pas përfundimit të punimeve të seancës plenare. Fjala ishte për të dhëna se kreu i Rendit, sipas tij është i lidhur me krimin dhe me vetë Bamin, emrin që këto ditë po përflitet si njeriu që është paguar për t`i bërë atentat deputetit Tom Doshi. Kjo formë e të bërit politikë, e ndihur së fundi dhe nga trendi i madh teknologjik në fushën e komunikimit oral dhe vizual, nuk ka asnjë lidhje me atë çfarë presin njerëzit nga politika. Ky mund të jetë një detaj “spektakolar”, por gjithsesi periferik, i politikës sonë; por fakti që ky lloj “spektakli” po shndërrohet në thelbin apo bazën e mënyrës së të bërit politikë, e bën atë ekstremisht të trishtueshëm. Berisha, Braho, e të tjerë si ata, nuk janë aty për t`u marrë me hetime dhe denoncime, por për të hartuar ligje e politika në shërbim të njerëzve.
Nëse nuk e bëjnë këtë, prirja e tyre për të bërë politikë më të dhëna nën rrogoz, nuk do i shërbejë askujt: as vendit e as vetë atyre, nëse e kanë për dert emrin e mirë që duan të lenë në kujtesën e njerëzve. /tesheshi.com/
