Mediat shqiptare kanë përjetuar sonte natën më të errët, duke shkruar edhe një faqe të zezë , ndërkohë që gremina e publikut me komunikuesin natyral të tij, gazetarin është thelluar së tepërmi.
Një grup mediash online që jetojnë vetëm për të bombarduar publikun pa pikë turpi apo profesionaliteti sonte bënë gjëmën! I vdiqën Mërgim Mavrajt të atin ndërsa luani kuqezi jepte shpirtin në fushë për të përmbysur rezultatin pas autogolit fatal. Mendoni impaktin e njerëzve të familjes Mavraj në të gjithë botën. Ndërsa lexonte fjalët e dedikuara pas golit “babi të dua”, padyshim që i ati mbante telefonat në vesh për të sqaruar njerëzit në mbarë botën që e kanë pyetur për shëndetin.
Dhe pasi e bënë turpin ato media (s’ka nevojë t’i përmendim emrat), e hanë atë me bukë dhe nuk kërkojnë as ndjesë, por drejtojnë gishtin duke fajësuar çdo kënd që të gjejnë përpara, a thua se atë lajm të kobshëm nuk e kanë shkruar vetë pa pyetur të paktën njerëz të afërm të familjes Mavraj, që i gjen kollaj në Facebook apo rrjete të tjera sociale.
Ndërkohë, Televizioni Publik Shqiptar ishte mavria me bojë në natën e mbrëmshme. Profesionalizmi kapte nivele skandalisht të ulëta, ndërkohë kur TVSH të paktën për korrektësi e saktësi në kohën e Vladimir Grillos ishte pikë referimi.
Mbrëmë kishte gazetarë që para trajnerit De Biazi e pyesnin duke folur nja 5 minuta kot e duke nxjerrë lloj lloj lakrash. Ndërsa kishin thirrur zv/trajnerin Tramexani, pa etikë e larguan duke thënë se do të vijë Cana. Ndërsa Hygerta Sako, kur të gjithë e dijnë se Mërgim Mavraj është një lojtar besimtar musliman, e pyet që “a të solli fat hajmalia”. Mavraj me shumë qetësi dhe zgjuarsi ju përgjigj se “unë nuk besoj te hajmalitë por tek Zoti”. Nuk foli fare për skandalin e lajmit që shpërndanë mediat.
Ndërkohë, media që përhapte lajmin qoftëlarg për Mavrajn shkruante fleshe se shqiptarët festojnë me breshëri…Dhe për pamje jepte një person në shtëpinë e tij e që pamjen e kishte publikuar në rrjetet sociale. Po pse media është kjo?!
(tesheshi.com)
