E hëna ku paralajmërohej një përplasje e ashpër Rama – Doshi në grupin e PS-së, nisi me lajmin e të dhënave dëshpëruese të një investigimi të revistës Monitor, për ritmet ende të larta të braktisjes së vendit, Shqipërisë. Shkruhej aty ndër të tjera se ritmet e ikjes do vijiojnë, e se prej kësaj vale ikanake, pasojat sociale janë e do jenë të mëdha. Nëse ne do ishim një shoqëri deri diku me një ndërgjegje jo krejtësisht të asfiksuar, e një media po ashtu, as që do na interesonte fati i Tomës, por do rendnim t`i kapnim drejtuesit tanë prej kindeve të xhaketave për t`i pyetur: përse e çuan e po e çojnë vendin në këtë pikë?! Çfarë bëtë e çfarë po bëni për ta bërë të jetueshëm këtë vend, në fshatra apo qendra urbane? Çfarë lloj prindërish jeni që u lini fëmijëve një atdhe kaq të ndyrë e më kaq probleme? Do u kërkonim të dilnin në konferenca shtypi që të na thonin se a ndjenin përgjegjësi për këto tregues, për të mos thënë turp? Do i kërkonim ish-kryeministrit të këtij vendi deri para dy vitesh që, në vend të se të shkruajë fletërrufe politike në FB për kundërshtarët e tij që i morrën pushtetin, të na thoshte se ç`lloj Shqipërie la pas 8 vjetësh qeverisjeje? Aman, vetëm mos na thotë që e futi në NATO dhe ia hoqi vizat! Se jemi gati t`i themi: na largo nga NATO-ja, na i rivendos vizat, në djall integrimi, vetëm të na kishe lënë një vend normal, me njerëz të ndershëm, që punojnë e nuk e kanë mendjen të zhvasin ngado; një vend që nuk të depresionon në çdo hap që hedh, që nuk të shtie tutkën kur sheh se ç`skotë ka në krye të punëve; një vend ku ligjin nuk e bën i ligu, ku nuk qelbet gjithandej, ku nuk ke frikë të hapësh televizorin se mos “bombardohesh” nga ekrani me lajme absurdesh që prodhohen parreshtur e me shumicë brenda 28 mijë kilometrave katrorë. Do pyesnim këtë aktualin në krye të vendit se përse nuk mundi t`i motivonte mbi 45 mijë shqiptarë në dy vite që qeveris që mos iknin, por të qëndronin këtu? Jo! Ne zgjodhëm Tomën, t`i harxhonim energjitë më të, të gjithë pa përjashtim. Dhe kjo ishte fitorja e Tomës! Po, dje fitoi Toma! Dhe në një Shqipëri ku, pavarsisht pse e qysh, fitorja në fund i takon Tomës, patjetër që ikja nuk do të ndalet; dhe jo thjesht për çështje ekonomike! /tesheshi.com/
