Nga Mensur Krasniqi
Pas takimeve të fundit me liderët e partive politike shqiptare, i dërguari special i Gjermanisë për Maqedoninë, Johan Hajndëll ka vlerësuar se e vetmja rrugë për dalje nga kriza politike është Marrëveshja e Përzhinos. Mirëpo lajmi i keq sipas tij është se procesi për zbatimin e kësaj marrëveshje është bllokuar, kriza vazhdon të zgjasë, ndërsa koha po skadon.
“Vlerësimi im është Marrëveshja e Përzhinos duhet të riafirmohet sepse mundëson kornizë për procesin e reformave që janë të rëndësishme për dalje nga kriza dhe për avancim në rrugën euro-atlantike të vendit”, ka deklaruar sot Johanes Hajndëll.
Në vazhdim Hajndëll ka numëruar tre kushte për të cilat, siç tha ai, nuk guxon të zgjatet më tej, por duhet të zbatohen me përpikshmëri.
“Së pari partitë duhet të dakordohen për datë për zgjedhje dhe të bëjnë atë që është e nevojshme për zgjedhje të drejta dhe të lira. Së dyti, Prokurorisë Speciale duhet mundësuar që të punoj pa opstrukcione, dhe e treta, partitë duhet të merren vesh për të zbatuar reformat e notuar në Raportin e Pribesë, dhe këtë duhet ta bëjnë pa prolongime të mëtutjeshme”, ka shtuar Hajndëll.
Lideri i partisë shqiptare në pushtet, BDI-së, Ali Ahmeti pas takimit me Hajndëll nuk pranoi të flasë para gazetarëve. Megjithatë qëndrimin e tij e ka bërë të ditur nëpërmjet një kumtese për media. Sipas Ahmetit, BDI mbështet në tërësi pikat, të cilat i ka caktuar përfaqësuesi gjerman, Johan Hajndëll.
“Ahmeti dhe Hajndëll shkëmbyen opinione për zhvillimet e fundit politike në Maqedoni dhe mënyrat për tejkalim të sfidave të mbetura. Lideri i BDI-së Ahmeti i shtjelloi hapat e vazhdueshëm të Bashkimit Demokratik për Integrim për tejkalim të ngërçit politik. Ahmeti konsideron që tërheqja e tërësishme e faljeve nga z. Ivanov mundëson dialog për përpilim dhe miratim të reformave prioritare. Partitë politike duhet të angazhohen për miratimin e ligjeve dhe plotësimin e kushteve për mbajtje të zgjedhjeve parlamentare si dhe të mbështesin Komisionin Shtetëror Zgjedhor dhe Prokurorinë Speciale që ta bëjnë punën e vet të përcaktuar me ligj”, thuhet në njoftimin e BDI-së.
Për dallim nga Ahmeti, kreu i partisë shqiptare në opozitë, PDSH-së, Menduh Thaçi u shpreh pesimist se bisedimet do të rezultojnë me ndonjë sukses. Ai tha se për PDSH-në është i papranueshëm insistimi që të arrihet marrëveshje në mënyrë selektive për çështje të Marrëveshjes së Përzhinos. Sipas tij PDSH kërkon një dialog gjithëpërfshirës, ku të gjitha palët do të paraqesin kërkesat dhe qëllimet e veta e në bazë të kësaj të gjendet një zgjidhje.
“Marrëveshja politike duhet të jetë e plotë, dhe ajo marrëveshje politike duhet të ketë zgjidhje të vërtetë për dalje nga kriza. Nuk dua të dal si një politikan që nuk ka shpresa për më tutje. Insistimi i bashkësisë ndërkombëtare dhe i të dërguarit special të Gjermanisë, që ta ngjall Marrëveshjen e Përzhinos, mendoj se nuk do të rezultojë me ndonjë sukses rezultat . Nuk kam diçka të re tu them prej para dy tre javëve , mendoj se çështja është në vend. Rikthimi i Qeverisë së vjetër VMRO-BDI, e ka komplikuar tej mase situatën”, ka deklaruar pas takimit kryetari i PDSH-së, Menduh Thaçi. /tesheshi.com/
