Zogjtë e fshatit mund t’i përgatisni në shtëpi. Ndiqni recetën e mëposhtme, duke ruajtur lëngun e tyre të shijshëm. Mund t’i shoqëroni me garniturë me patate. Nuk kërkojnë shumë kohë për t’u gatuar dhe në fund mund të shtoni majdanoz të grirë hollë.
Përbërësit:
Për 4-5 persona duhen:
500 g zogj
1 lugë gjelle miell
2-3 kokrra domate
1 filxhan kafeje verë
50 g gjalpë
Kripë
Piper i zi
Majdanoz i grirë hollë
Patate sipas dëshirës
Përgatitja:
Pastroni zogjtë nga puplat dhe përcëllojini, nëse i keni të freskët. Hiquni të brendshmet dhe lajini mirë. Pritini në katër pjesë dhe çdo copë kalojeni në miell dhe skuqeni nga të dyja anët në tigan me gjalpë.
Pastaj hidhni domatet të qëruara dhe të prera në kubikë të vegjël, kaurdisini pak, shuheni përzierjen me verë, hidhni kripë, piper të zi dhe pak ujë. Lërini në zjarr të mbuluara me kapak për 10 -15 minuta dhe pastaj vendosini në pjatë.
Mbi to hidhni lëngun dhe garniturën me patate të ziera të kaluara në tigan me pak gjalpë. Hidhni majdanoz të grirë hollë përsipër./tesheshi.com/
