Kjo e shtunë shënon 23 vite nga Masakra e Reçakut në Kosovë, ku më 15 janar 1999 u vranë 45 shqiptarë të zakonshëm, fshatarë të disa moshave, të rinj e pleq, gjë që shënoi bindjen e ndërkombëtarëve se duhej ndërhyrë me patjetër në Kosovë ndaj forcave serbe.
Ishte shefi i atëhershëm i misionit vëzhgues të OSBE-së në Kosovë, ambasadori Ëilliam Ëalker, i cili e pat cilësuar masakrën në fjalë si krim kundër njerëzimit dhe i bëri thirrje bashkësisë ndërkombëtare për të ndërhyrë.
Vitet e fundit, kjo ngjarje e rëndë që shenjoi dhe ndërgjegjësimin ndërkombëtar mbi atë çfarë po ndodhte në Kosovë, për t’u pasuar nga bombardimet e NATO-s, është kthyer në debat mes Kosovës dhe Serbisë, pasi zëra nga Beogradi, ku veçon Aleksandër Vulin, e quajnë atë një sajesë.
Ndaj, ambasadori i ri amerikan në Kosovë, Jeffrey Hovenier, duke e përkujtuar këtë ngjarje, tha se “pranimi i të vërtetës së të kaluarës është vetëm hapi i parë kah drejtësia”.
“Askush të mos harrojë ose mohojë se çka ndodhi këtu ose përse Shtetet e Bashkuara të Amerikës dhe aleatët tanë u ngritën në mbrojtje të popullit të Kosovës”, tha Hovenier.
Ai citoi ish-Presidentin Clinton që në atë kohë do thoshte: “Ishte një akt vrasës i qëllimshëm dhe pa dallim që synonte të mbillte frikë te populli i Kosovës”.
Gjithashtu, presidentja Vjosa Osmani shkruan:
“Sot në vendin e ngjarjes, te Kodra e Bebushit, aty ku ndodhi masakra në Reçak, dëgjuam rrëfimet e tmerrit të të mbijetuarve të masakrës. Lavdi e përjetshme të gjithë të rënëve për lirinë e Kosovës”.
Ndërsa kryeministri Albin Kurti, në një aktivitet përkujtues, tha ndër të tjera: “Mohimi i gjenocidit përpiqet të riformësojë historinë në mënyrë që të demonizojë viktimat dhe të rehabilitojë autorët. Mohimi i gjenocidit është faza e fundit e gjenocidit. Është ajo që Elie Wiesel e ka quajtur një ‘vrasje e dyfishtë’.
Mohimi vret dinjitetin e të mbijetuarve dhe kërkon të shkatërrojë kujtimin e krimit. Në një shekull të rrënuar nga gjenocidi, ne pohojmë domosdoshmërinë morale të kujtimit.
Ne jemi kundër hakmarrjes. Ne duam drejtësi. Dhe, ne refuzojmë të harrojmë”. /tesheshi.com/
