Kryepleqtë e periferive të Tiranës dhe fshatrave përreth janë rebeluar ndaj Erion Veliajt, i cili ka ulur pagesën për pushtetarin më të vogël lokal që ndodhet në territor.
Kryepleqtë paguhen 4 mijë lekë në muaj, ndërkohë që kjo shumë konsiderohet si qesharake nga ata.
Njëri prej tyre tha se puna e tyre ishte me mjaft përgjegjësi, pasi ata monitorojnë me detaje të gjithë territorin që të mos mbillet kanabis.
“I bie zonës pash më pash dhe nëse kapet drogë, policia më arreston mua përse nuk e ruajta, por pagesa jonë është qesharake”, thotë kryeplaku, i cili dëshiron që të mos e identifikojë emrin në media pasi i druhet një ndëshkim nga ana e bashkisë.
Sipas tij, ka bashki edhe më të vogla sesa Tirana që i paguan më shumë kryepleqtë. Përmendet si shembull bashkia e Elbasanit, ku pagesat kanë arritur deri në 12 mijë lekë në muaj.
Kryepleqtë janë ish-krerët e lagjeve të dikurshme dhe janë organizuar kryesisht në zona rurale. Por në Tiranë, disa prej këtyre zonave si Yzberishi, Kashari Farka etj., janë kthyer në territor urban si pasojë e ndërtimeve që janë kryer në këto vite.
Kryepleqtë e irrituar pritet që këto ditë t’i mësyjnë kryebashkiakut t Veliaj për të kërkuar zyrtarisht rritjen e pagës. /tesheshi.com/
