Kisha Ortodokse Greke u rebelua kundër urdhrit të qeverisë për të mbyllur kishat për një javë për shkak të pandemisë së virusit Corona dhe urdhëroi priftërinjtë të linin besimtarët në ndërtesat fetare në Epifani.
Qeveria greke ka vendosur që, në javën para hapjes së shkollave, nga 3 deri më 10 janar, do të jenë në fuqi kufizime më të rrepta për të shtypur virusin, i cili përfshin dhe mbylljen e kishave për besimtarët.
Sidoqoftë, Sinodi i Shenjtë i Kishës Ortodokse Greke me ndikim, tha të hënën se ajo “nuk pranon” kufizimet e reja dhe do t’i dërgojë një letër proteste qeverisë së qendrës së djathtë.
Pas një rritjeje në numrin e infeksioneve të reja dhe vdekjeve nga koronavirusi në Greqi në nëntor, kur u mbushën njësitë e kujdesit intensiv, autoritetet vendosën kufizime të rënda në lëvizje për herë të dytë, duke mbyllur shkollat dhe duke pezulluar shumicën e aktiviteteve ekonomike.
Masat u lehtësuan pjesërisht përpara Krishtlindjeve, të cilat krekët festojnë më 25 dhjetor, kur kishave, dyqaneve që nuk shesin mallra të nevojshme dhe parukierëve iu lejua të rifillojnë disa aktivitete me kufizime të caktuara.
Por në prag të hapjes së shkollave më 11 janar, pas dy muajsh, masat e mëparshme të ashpra janë përsëri në fuqi.
Priftërinjtë lejohen të kryejnë shërbimin fetar për Epifaninë, por pa besimtarë.
Sinodi deklaroi se qeveria duhet t’u përmbahet kufizimeve më të buta që ishin në fuqi në kohën e Krishtlindjes, të miratuara pas negociatave me Kishën, sepse klerikët u kujdesën gjatë pushimeve që të respektoheshin të gjitha masat e rëna dakord. /tesheshi.com/
