Zyrtarët e opozitës siriane njoftuan të shtunën, se është arritur një marrëveshje e re me regjimin e Asadit, për evakuimin e plotë të enklavës së mbajtur nga opozita në Halepin lindor.
Më herët është raportuar për ndërprerje të evakuimeve nga Halepi lindor, ndërkohë që po vazhdojnë negociatat në mes të dyja palëve, në veçanti në lidhje me fshatrat Foua dhe Kfarya, të cilat shtrihen në rajonin e kontrolluar nga opozita, në Sirinë veriperëndimore.
Marrëveshja e re parashikon evakuimin e plotë të civilëve në Halepin lindor.
Observatori Sirian për të Drejtat e Njeriut me bazë në Britani, tha se evakuimi i 4,000 njerëzve, përfshirë të plagosurit nga fshatrat Foua dhe Kfarya pritet të fillojë të shtunën.
Evakuimi i Halepit është ndërprerë të premten, pas një raportimi për të shtëna në një pikë kalimi nga të dyja anët e konfliktit. Mijëra persona janë evakuuar para se të ndërpritet procesi. Regjimi i Asadit tha se shpërnguljet e fshatit dhe ato në Halepit lindor duhet të kryhen në të njëjtën kohë.
Media ushtarake e Hezbollahut tha se marrëveshja e re përfshin fshatrat e mbajtura nga forcat rebele, Madaya dhe Zabadani pranë kufirit me Libanin, ku dhjetëra mijëra njerëz janë të bllokuar nën rrethim nga forcat e regjimit të Asadit dhe grupit libanez.
Pjesë të Halepit të mbajtura nga opozita, janë rrethuar nga regjimi i Asadit që nga fundi i gushtit, duke shkaktuar shkatërrime të mëdha në qytet.
Regjimi i Asadit, i mbështetur nga sulmet ajrore ruse dhe mijëra milicive të mbështetura nga Irani, kanë bërë së fundmi përparime të ndjeshme drejt Halepit lindor të mbajtur nga opozita.
Presidenti Rexhep Tajip Erdoan dhe homologu i tij rus Vladimir Putin kanë ndërmjetësuar një marrëveshje të martën, për evakuimin e civilëve nga enklava e bllokuar. Megjithatë, marrëveshja për armëpushim dhe evakuimi deri më tani janë shkelur disa herë nga grupe paraushtarake të Asadit dhe të mbështetura nga grupe militante të Iranit./tesheshi.com/
