Në Spanjë janë gjithnjë e më të sigurtë. Në Angli po “përpiqen” të binden. Koha do të tregojë cila mes dëshirës dhe marketimit, do të prevalojë. E për të mos shtuar elementë “quizi”, po e bëjmë të ditur edhe objektin: Ai është Hari Kein, futbollisti i Totenhemit dhe i Kombëtares së Anglisë, i cili prej kohësh shihet si i vetmi lojtar për të cilin Reali i Madridit mund të bëjë çmenduri në merkato.
Mediat spanjolle shkruajnë se për sulmuesin, Reali po përgatit një çmim rekord, por që mund të “amortizohet” disi nga përfshirja në marrëveshje edhe të ndonjë ylli nga “galaktikët”.
Skenari që ngrenë gazetatat është ky: vlera e Kein mund të arrijë deri në 200 milion euro, prej të cilave, mbi 100 do të jepen “cash”, e pjesa tjetër, do të “kompensohet” me rikthimin në Londër të Garet Bejl. Uellsiani nuk ka rezultuar të jetë lojtar kyç për Realin këtë sezon, e mund të jetë i “sakrifikuari” që “Hurricane” (uragani) siç thërritet sulmuesi i Totenhem, “të zbarkojë” në Madrid. /tesheshi.com/
