E bukura dhe e shëmtuara! Kështu mund të krahasohen dy gjysmëfinalet e Champions League-s. Bajern i Mynihut – Atletiko e Madridit qe një ndeshje ku nuk mungoi asgjë, ndryshe nga takimi Real i Madridit – Mançester Siti, që kishte pandërprerë momente gjumëvënëse.
“Nuk meritonim të humbisnim,” do të deklaronte trajneri i Man. Sitit pas ndeshjes. Por ekipi i Pellegrini-t dështoi gjatë gjithë ndeshjes të ofronte çaste të ndezura, lojë të ndezur, pa arritur t’i imponohej kundërshtarit.
Me 90 minutat e para në Angli të mbyllura 0-0, sfida e mbrëmshme do duhej të ishte e luftuar fort. Por nuk rezultoi të qe kështu.
Udhëtuesit nga Anglia u goditën kur kapiteni i tyre, Kompany, e la fushën në minutën e dhjetë i dëmtuar. Dhe avantazhi për vendasit do të vinte shpejt, në minutën e 20-të, kur Fernando prek një top të gjuajtur nga Bale dhe shënon autogol.
Reali mori kryesimin 1-0, që e çonte atë në finale. Me Ronaldo-n e kthyer në fushë pas një mungese të konsiderueshme, madrilenët patën dhe raste të tjera për ta dyfishuar rezultatin. Mançesteri reagoi në mënyrë sporadike, por pa ushtruar presion të vazhdueshëm.
Në fund, Reali fitoi 1-0, duke gjetur përsëri në finale Atletikon e Madridit. Dy vite më parë Reali fitonte në finale 4-1, pasi do ta arrinte barazimin në lojën e rregullt në minutën e 93-të, për të shënuar tre herë të tjera më tutje në shtesa. Më 28 maj, në Milano, Atletiko me siguri nuk do të dëshirojë aspak t’i ikë nga duart kjo mundësi e dytë.
Te Mançester Siti do të presin akoma për të përjetuar një finale. Si Pellegrini dhe Guardiola i lënë ekipet e tyre, Mançesterin dhe Bajernin, pas tre vitesh pa arritur objektivin më të rëndësishëm, atë të arritjes në finalen e Champions League-s. Pep Guardiola do të ketë shumë punë te Mançester Siti para se të provojë sërish të njëjtën gjë. /tesheshi.com/
