Çfarë ndeshje, çfarë drame në “Santiago Bernabeu”!
Reali bëhet gati të lërë pikë përballë Deportivo la Korunjës, kur ja, shfaqet ai përhershmi, shënuesi i çasteve të fundit, Sergio Ramos.
Një javë më parë, Barcelona thuajse po u gëzohej tre pikëve ndaj Realit, duke harruar se ndeshja nuk kishte mbaruar ende. Sergio Ramos do të shënonte në minutën e 90-të, duke barazuar lojën.
Historia përsëritet shtatë ditë më pas, teksa Reali është në barazim me Deportivon. Sergio Ramos shënon gati njësoj, me kokë, në të njëjtin krah të portës: Reali fiton përfundimisht 3-2!
Pa Ronaldo-n e Benzema-në, Reali e ka patur të vështirë sonte. Pjesa e parë nuk ka patur gola, gjë që nuk ndodh në të dytën, ku shënohen pesë të tillë.
Fillimisht është Morata që i kalon në avantazh vendasit. Joselu realizon dy herë, për t’ua kaluar epërsinë miqve. Intensiteti i lojës bëhet i jashtëzakonshëm në minutat e fundit, ku nuk mungojnë dhe përplasjet e forta fizike te porta e Deportivos.
Mariano Diaz vë barazpeshën në minutën e 84-t me një gol mjaft të bukur me kokë. Sergio Ramos vulos gjithçka, po me kokë.
Gjyqtari i bie bilbilit të fundit në minutën e 97-të. Fitorja 3-2 është për Realin e Madridit. /tesheshi.com/
