Reali i Madridit kishte mundësinë më të mirë ta thellonte diferencën me kundërshtarët e ta kryesonte bindshëm La Ligën, por bëri të kundërtën kur humbi ndaj Valencias këtë mbrëmje.
Largësia me Barcelonën e vendit të dytë mund të kishte shkuar në katër pikë; në të kundërt ajo është vetëm një pikë, e veç Barçës, pranë është dhe Sevilja, me tre pikë më pak se Reali.
Një prej dy takimeve të prapambetura të skuadrës madrilene, ajo në “Mestalla” nuk ka shkuar aspak ashtu siç duhet. Për Valencian ka qenë një fillim i vrullshëm, i kurorëzuar me dy gola në nëntë minuta. Simone Zaza dhe Orellana e çuan shpejt rezultatin në 2-0.
Çfarë tronditje për një skuadër që nuk pësonte dy gola brenda dhjetë minutave të para që nga viti 2003!
Cristiano Ronaldo dha shpresa kur ngushtoi shifrat në fundin e pjesës së parë me një gol me kokë. Pjesa e dytë foli për madrilenët, që edhe pse bënë presion të vazhdueshëm, edhe pse u përforcuan me futjen në lojë të uellsianit Bale, nuk mundën ta shmangin humbjen 2-1.
Humbja e dytë në kampionat për Realin, që të dielën ka një tjetër ndeshje të vështirë, atë në fushën e Vilarealit. /tesheshi.com/
