Futbolli është një lojë që në çdo çast të ofron befasi. Një befasi e tillë janë dy humbjet e njëpasnjëshme të Realit të Madridit pikërisht me arritjen e rekordit të 40 ndeshjeve në radhë pa humbje!
Dy humbje brenda tre ditëve, aq sa skuadra e drejtuar nga Zinedine Zidane kishte pësuar në vitin e shkuar, asokohe nga Atletiko e Madridit në kampionat dhe nga Volfsburgu në Ligën e Kampionëve.
Këtë herë janë Sevilja dhe Selta Vigo që i sjellin dy humbje Realit. Sevilja i mposhti madrilenët të dielën në La Liga, duke fituar 2-1; po kaq, 1-2, fitoi dhe Selta Vigo mbrëmë në “Santiago Bernabeu”, në ndeshjen e parë të çerekfinaleve të Kupës së Mbretit.
Golat në takimin e së mërkurës u shënuan brenda gjashtë minutave. Iago Aspas realizoi për Seltën në minutën e 64-t, Marcelo barazoi në të 69-n, e pa u mbushur mirë e 70-ta minutë, Jonny Castro tundi sërish rrjetën e vendasve.
Zinedine Zidane mori përgjegjësinë për humbjen; për të, është një moment i keq i skuadrës.
“Unë jam përgjegjësi dhe unë duhet të gjej zgjidhjen. Nuk jam i shqetësuar, ndonëse është një moment i keq. E dimë si mund ta kapërcejmë atë, dhe do ta kapërcejmë,” deklaroi tekniku francez, që provon për herë të parë dy humbje radhazi në drejtimin e Realit.
Madrilenët presin të shtunën Malagën për kampionat, e të mërkurën e ardhshme do të luajnë në fushën e Selta Vigos, në ndeshjen e kthimit të çerekfinaleve të Kupës së Mbretit. /tesheshi.com/
