Uellsianit i mbaron kontrata aktuale në 2019-ën, por te Reali i Madridit janë gati t‘ia zgjasin atë me dy vite të tjera, duke mos lënë mënjanë një goxha përmirësim financiar.
Të dielën, me golin e shënuar në fitoren 4-0 të skuadrës së tij ndaj Seviljes, ai u bë golashënuesi më i mirë britanik në kampionatin spanjoll. Me 43 gola të shënuar në 76 ndeshje, ai la pas Gary Lineker-in, i cili luajti dekada përpara për Barcelonën dhe shënoi 42 gola në 103 ndeshje.
Siç vë në dukje dhe britanikja Daily Telegraph, rekordi i tij do t’i japë fund dhe debatit nëse Gareth Bale ka qenë një sukses në Spanjë apo jo.
Bisedimet për një kontratë të re nuk kanë nisur ende, por klubi madrilen është i gatshëm t’ia rrisë pagesën javore prej 300.000 paundësh, edhe pse kjo mund të ketë një ndikim negativ te Cristiano Ronaldo.
Reali i Madridit kërkon të shmangë çdo rrezik për largimin e uellsianit, i cili ka dhe mbështetjen e presidentit Florentino Perez.
26-vjeçari është kthyer të luajë për Realin pas një dëmtimi që e la atë për javë të tëra jashtë fushës së futbollit. 15 janë golat e tij të shënuar në La Liga në këtë sezon. Gareth Bale ka qenë përcaktues gjithashtu në kualifikimin e Uellsit për në Euro 2016. /tesheshi.com/
