Reali është makth për Atletikon në Champions League. Ia zë rrugën ku të mundet, në çerekfinale, në gjysmëfinale, në finale, e kurdo del fitues.
Tanimë te Atletiko kanë veç një shpresë për ta fituar trofeun e Champions Leagues: të mos e ndeshin më Realin gjatë rrugës!
Në “Vicente Calderon” ka patur luftë të vërtetë në 45 minutat e para të gjysmëfinales së dytë mes Atletikos dhe Realit. Furtuna e minutave të para të vendasve është shpërblyer me dy gola. Saul dhe Griezmann kanë shënuar në minutën e 12-të dhe të 16-të.
Një furtunë që fashitet pas rezultatit 2-0, për ta marrë lojën në dorë udhëtuesit, që e gjejnë golin në minutën e 42-të. Atëherë kur Benzema bën një mrekulli me topin, duke shmangur tre lojtarë kundërshtarë në vijën fundore, me aksionin të përfunduar nga Isco, që gjendet në vendin e duhur, në momentin e duhur.
Goli u ka prerë krahët vendasve, që janë mjaft të turbullt në pjesën e dytë, aq sa nuk shfrytëzojnë dot dhe disa raste mjaft të pastra.
Ndeshja mbyllet siç u hap, me furtunë, po këtë herë jo lojtarësh, por shiu.
Rezultati 2-1 çon Realin në finale, ngase ka fituar 3-0 në takimin e parë. Në finalen ku e pret Juventusi.
Atletiko duhet të presë akoma për trofeun e parë në Champions League! /tesheshi.com/
