Dështimet dhe turpërimet e Realit të Madridit nuk kanë të sosur në këtë sezon të nisur me këmbën e majtë.
David De Gea ishte portieri që Reali e deshi me ngulm gjatë muajve të verës, por që nuk arriti ta marrë falë një budallallëku. Në ditën e fundit të transferimeve, në çastet e fundit, shkresat për transferimin nuk arrijnë në kohë, dhe De Gea detyrohet të qëndrojë në Angli, te Mançester Junajted.
Më 21 nëntor, pas një serie ndeshjesh jobindëse, Reali i Madridit humbet në shtëpi ndaj rivalit të përjetshëm, Barcelonës. E bën këtë në mënyrën më të keqe të mundshme, me një lojë mediokre dhe me një rezultat turpërues: 0-4.
Dhe pason një tjetër histori banale, që nuk i ka aspak hije një klubi të tillë gjigand. Më 2 dhjetor Reali i Madridit luan ndaj Kadizit, në fushën e këtij të fundit, në kuadër të Kupës së Mbretit.
Reali fiton bindshëm, 1-3, dhe golin e parë, në minutën e tretë, e shënon rusi Denis Çerishev (Denis Cheryshev). Në pjesën e dytë ai zëvendësohet, pasi drejtuesit e klubit kuptojnë se kanë bërë një gafë. I dhënë me qira vitin e shkuar te Vilareali, Çerishev ka marrë tre kartona të verdhë, që nënkuptojnë automatikisht një ndeshje pezullim.
Florentino Perez, presidenti i Realit të Madridit, deklaroi dje se besonte që klubi nuk i kishte shkelur rregullat, pasi as lojtari, Çerishevi, e as klubi nuk ishin njoftuar për dënimin. Por besimi i Perezit nuk piu ujë.
Sot Komisioni i Garave në Federatën Spanjolle të Futbollit ka vendosur ta përjashtojë Realin e Madridit nga Kupa e Mbretit, sepse ka aktivizuar një lojtar të pezulluar gjatë ndeshjes ndaj Kadizit këtë të mërkurë në stadiumin “Ramon de Carranza”.
Klubi madrilen është gjobitur dhe me 6.000 euro për të njëjtën shkelje. Përjashtimi ka efekt të menjëhershëm, kështu që ndeshja e kthimit në “Santiago Bernabeu” nuk do të luhet.
Reali i Madridit ka njoftuar se do ta apelojë vendimin, së pari në Komisionin e Apelit, e më pas, nëse është e nevojshme, dhe në Tribunalin Sportiv Spanjoll.
Krenaria e Madridit, skuadra mitike e Realit, po kalon një moment jo pozitiv dhe në kampionatin spanjoll, ku gjendet aktualisht në vend të tretë, pas Barcelonës dhe Atletikos së Madridit. /tesheshi.com/
