Gjatë ditëve të fundit kanë qarkulluar zëra të shumtë në mediat spanjolle se gjiganti mbretëror, Reali i Madridit, po përpiqet të “vjedhë” lojtarë nga rivali i përjetshëm, Barcelona.
Nuk është vetëm braziliani Nejmar që ka rënë në “grepin” e zyrtarëve madrilenë, pasi drejtuesit e skuadrës nga kryeqyteti i Spanjës kanë tentuar edhe në të kaluarën të transferojnë futbollistë nga Barcelona.
Madje, bëhet fjalë për lojtarin më të mirë në botë, Lionel Mesin, që në jo më pak se tre raste është kërkuar t’u bashkohet madrilenëve, çka ka gjetur një refuzim kategorik në të tre herët.
Informacionin për tre takimet e ka dhënë stacioni radiofonik spanjoll Cadena Cope.
Përpjekja e parë për të nënshkruar me Mesin ngjau në verën e vitit 2011, por ndërmjetësi mori këtë përgjigje: “Faleminderit për interesin, por Mesi nuk lëviz.”
Dy vite më vonë, ndërsa Ronaldo ngurronte të firmoste në kontratën e re, pati sërish një tentativë të pasuksesshme për t’i veshur Mesit bluzën e Realit të Madridit.
Dhe refuzimi i fundit i Mesit ka qenë një vit më parë, teksa madrilenët po mundoheshin të forconin radhët me të. /tesheshi.com/
