Cristiano Ronaldo më në fund ka gjetur golin e dytë në La Liga dhe Reali i Madridit ka vuajtur për të fituar ndaj modestëve të Malagas.
Në një ndeshje shumë të luftuar, Reali nuk ka mundur të dominojë dhe tifozët në faza të caktuara, kanë vërshëllyer skuadrën e tyre.
Në fillim ishte Casemiro që shënoi që në minutën e 10-të, por miqtë barazuan brenda 10 minutave me Rolan. Reali sulmon sërish, por edhe Malaga nuk qëndron në mbrojtje. Benzema kalon në avantazh Los Blancos dhe më pas, portieri portugez i Malagas, Roberto, e kthen në sfidë personale duelin me Ronaldon, duke i pritur atij 3 gjuajtje të ndryshme, me të djathtën, me të majtën dhe me kokë.
Në pjesën e dytë Malaga shfaqet e rrezikshme dhe në një kundërsulm, Castro gjuan nga jashtë zone dhe topi i fortë dhe tokas, i shpëton nga duart portierit Casilla, e përfundon në rrjetë. Reali përpiqet të gjejë avantazhin, por edhe miqtë administrojnë mirë lojën. Hyrja e Modric në lojë gjallëron mesfushën dhe është pikërisht kroati që fiton një penallti, pasi kalon para mbrojtësit topin, e më pas pengohet prej tij. Cristiano Ronaldo që “ka harruar” të shënojë këtë sezon merr përsipër gjuajtjen nga 11 metra. Sërish portieri Roberto për pak “i nxin jetën”, pasi pret goditjen e parë, por nuk ka çfarë bën më, kur topi i kthehet sërish Ronaldos, që nga 1 metër larg shënon me të majtën.
Duke bërë xheste sikur po hiqte tersin nga vetja, Ronaldo nuk gëzon, sepse edhe goli i dytë në 10 javë kampionat, u shënua gjithë siklet. Megjithatë Reali fiton dhe afrohet në 7 pikë me Barcelonën, që luan të dielën. /tesheshi.com/
