Larg prej formacionit ideal, Reali i Madridit nuk e ka patur gjithsesi të vështirë të fitojë në ndeshjen e parë të La Ligës. Edhe pse pa tre prej lojtarëve kryesorë, pa Ronaldo-n, pas Benzema-në e pa Modric-in, madrilenët kanë marrë një fitore të pastër në fushën e Real Sociedadit.
Ndihmues ka qenë goli i uellsianit Gareth Bale në minutën e dytë, pas së cilit dominues në fushë ka qenë vetëm Reali i Madridit.
Marko Asensio do të bënte një tjetër paraqitje të mirë, duke u shpallur dhe lojtari i ndeshjes. Veç të tjerash, ai shënoi dhe një gol.
Bale do të fiksonte rezultatin 0-3 pas golit të dytë të tij, të shënuar në minutën e 94-t.
Fitorja e Realit erdhi si një përgjigje ndaj rezultatit tenistik të Barcelonës ndaj Real Betisit.
Skuadra tjetër e Madridit, u ndal mbrëmë çuditërisht nga Alavesi debutues.
Atletiko e kërkoi me ngulm golin gjatë gjithë lojës, por nuk e gjeti atë. Më në fund, në shtesat e 90-minutëshit, do të akordohej një 11-metërsh për lojtarët e Atletikos, i kthyer në gol nga Gameiro.
Por gëzimi nuk zgjat shumë, pasi në të vetmen gjuajtje në kuadrat të Alavesit, topi përfundon në rrjetë. Ca sekonda pas golit të Atletikos, Manu Garcia gjuan fort nga jashtë zonës, duke shënuar golin e barazimit.
Rezultati 1-1 qe zhgënjyes, aq më tepër që Atletiko luajti në fushën e saj ndaj një ekipi të sapongjitur në kategorinë superiore të futbollit spanjoll. /tesheshi.com/
