Se çfarë emri kërkon t’i vërë këtij sezoni Reali i Madridit, askush nuk po e kupton. Por çfarë shihet në fushën e lojës e në rezultate, pak vend lë për ta quajtur të suksesshëm.
Madrilenët janë turpëruar edhe në ndeshjet e Kupës së Mbretit, ku janë eleminuar nga inferiorët e Leganes. Për më keq akoma, janë mundur pikërisht në Madrid, me rezultatin 1-2. E pasi kishin fituar me vështirësi në ndeshjen jashtë fushe, 0-1, janë eleminuar nga një tjetër objektiv.
Edhe pse Zidane bëri një turn over me lojtarët, duke nxjerrë në fushë vetëm Isco, Ramos e Benzema, nga “të mëdhenjtë”, Reali nuk arriti të mbronte fitoren në transfertë. Një gol barazimi nga Benzema, vlejti vetëm për të parë francezin të shënonte, pasi miqtë shënuan përsëri dhe më pas mbrojtën fitoren.
Me tifozët e acaruar në kulm, me objektivin e larguar, me 16 pikë larg nga Barcelona, madrilenët e shohin deziluzionues sezonin, që ndoshta mund ta shpëtojnë nëse fitojnë Champions League…ku do të luajnë fillimisht kundër PSG. /tesheshi.com/
