Skuadra më në formë aktualisht në kampionatin italian, Roma ka patur mundësi të bëjë mrekullinë mbrëmë në “Santiago Bernabeu”, pasi nuk i kanë munguar rastet e pastra për të shënuar. Salah dhe Dzeko nuk bënë atë që duhej të bëjë çdo sulmues, ta dërgonin topin në rrjetë, edhe pse janë gjendur në pozita tepër të volitshme.
Reali e fitoi dhe takimin e dytë të 1/8-ave në Champions League ndaj Romës me të njëjtin rezultat, 2-0. Pasi romanët dështuan në një sërë përpjekjesh për të shënuar, ka qenë Ronaldo ai që i ka ndëshkuar miqtë. Në minutën e 64-t shënon golin e tij të 40-të në këtë sezon, e të 90-in në ndeshjet e luajtura në Champions League gjatë tërë karrierës.
Katër minuta më pas vjen dhe goli i dytë, i shënuar nga James Rodriguez, që e çtensionon tërësisht lojën.
Madrilenët shkojnë kështu në çerekfinalet e këtij aktiviteti për të gjashtin vit radhazi.
23 janë golat e realizuar nga Reali në këtë sezon të Champions League-s, më shumë se çdo skuadër tjetër, e bashkë me Barcelonën janë dy ekipet e vetme ende të pamposhtura gjer tani.
“Ishte një ndeshje e vështirë, por në fund arritëm objektivin tonë, që ishte të kualifikoheshim, dhe nuk pësuam gol,” ka deklaruar Zidane.
“Ne luajtëm mirë dhe merituam komplimente, por realiteti është se duhet të rritemi sa ka të bëjë me mentalitetin, bindjen dhe vendosmërinë.” Kështu e ka përshkruar situatën Spalletti, trajneri i Romës.
“Jemi të dobët, dhe në shenjën e parë të vështirësisë nuk mund të jemi ekipi që duhet të jemi. Nuk është se Reali i Madridit po kalon një periudhë me formë të jashtëzakonshme dhe për momentin janë të papërballueshëm,” i ka kritikuar ai të tijtë.
Në takimin tjetër të mbrëmjes të së martës, Volfsburgu u kualifikua në çerekfinale pasi mposhti 1-0 belgët e Gentit. Golin e vetëm e shënoi Schurrle në minutën e 74-t. Skuadra gjermane e kishte fituar 2-3 dhe takimin e parë në Belgjikë. Kjo është e para herë që Volfsburgu arrin në fazën çerekfinale të Champions League-s. /tesheshi.com/
