Reali i Madridit dhe Mançester Siti janë dy ekipet e para gjysmëfinaliste të Champions League-s. Kjo është e gjashta gjysmëfinale radhazi për madrilenët, ndërsa shënohet si e para për skuadrën angleze.
Në “Santiago Bernabeu”, e tërë ndeshja u shoqërua nga mbështetja e jashtëzakonshme e tifozerisë. E cila u shpërblye me një përmbysje fantastike të humbjes 2-0 në ndeshjen e parë ndaj Volfsburgut.
Ylli i ndeshjes qe Ronaldo, që shënoi një tregolësh dhe qe frymëzimi për ekipin e tij. Rezultati 3-0 ishte tërësisht i merituar, pasi skuadra madrilene e zotëroi lojën në çdo minutë të sajën. Volfsburgu nuk bëri thuajse asgjë, veçse priti pa fund sulmet e madrilenëve të papërmbajtshëm.
Portugezi e pranoi se ishte një nga paraqitjet e tij më të mira në Europë, por jo më e mira. Ai ia kushtoi fitoren De Felipe-s, një ish-futbollisti të Realit që ndërroi jetë dje.
Në takimin tjetër të së martës, në “Etihad Stadium”, Mançester Siti ia doli të shkojë për herë të parë në një gjysmëfinale të Champions League-s. Përballë PSG-së, anglezët u treguan cinikë dhe shënuan në momentin e duhur.
Barazimi 2-2 në 90 minutat e para e linte gjithçka të hapur për sfidën e kthimit. Dhe vendasit e Mançesterit treguan kujdes të madh të mos pësonin gol, por një meritë të veçantë ka portieri Hart, që bëri një seri pritjesh vendimtare.
Aguero, ashtu si Ibrahimoviç në ndeshjen e shkuar, humbi në pjesën e parë një 11-metërsh. Epërsia për Mançester Sitin do të vinte në minutën e 76-të, kur De Bruyne tregohet edhe një herë përcaktues me golin e tij.
Shifrat 1-0 nuk ndryshuan gjer në fund, pavarësisht përpjekjeve të francezëve, që për të katërtën herë e
ndalën vrapin në çerekfinale të Champions-it.
“Jam tepër i kënaqur, jo vetëm sepse fituam ndeshjen dhe u kualifikuam për në gjysmëfinale, por sepse fituam në stilin e lojës që ne duam. Nuk kërkuam të barazonim; ne treguam që nga fillimi që dëshironim ta mundnim PSG-në,” deklaroi trajneri i Man. Sitit, Manuel Pellegrini.
Reali dhe Mançesteri do të presin shortin e së premtes për të mësuar se ç’ekip do të kenë për kundërshtar në gjysmëfinale të Champions League-s. /tesheshi.com/
