Asgjë të re nuk kanë sjellë ndeshjet e së martës dhe së mërkurës në kampionatin spanjoll, duke konfirmuar supremacinë e tre ekipeve rivale për titull në sezonet e fundit, të Realit të Madridit, Barcelonës dhe Atletikos së Madridit.
Më së pari fitoi Atletiko e Madridit dy netë më parë, ndaj Real Sociedadit. Një fitore ekonomike, 1-0, me një gol të Filipe Luis-it në minutën e 28-të, aq sa për të mos iu ndarë dy kryesuesve e për të ruajtur vendin e tretë.
Për të ardhur te fitoret e mbrëmshme të Barcelonës dhe Realit të Madridit.
Katalanasit nuk e patën aspak të vështirë të mposhtin Seviljen. Një fitore e lehtë 3-0 ndaj një ekipi që nuk e shijon suksesin prej gjashtë ndeshjesh në të tëra aktivitetet.
Suarez shënoi një gol mjaft të bukur në minutën e 25-të, ndjekur nga dy të Messi-t në minutën e 28-të dhe të 33-të.
Pa treshen e zakonshme sulmuese, Bale, Benzema dhe Ronaldo, Reali nuk ndeshet gjithsesi me asnjë telash në tranfertën ndaj Leganesit.
Tre gola të shënuar brenda 23 minutave, ndërsa fitorja e tërë është 2-4, ku tre herë shënon veç Alvaro Morata, shto dhe një rrjetë të tundur nga James Rodriguez.
Sfida e vërtetë vjen të shtunën, kur do të luhet derbi i Madridit, Real – Atletiko.
Pas javës së 30-të, Reali kryeson me 71 pikë e me një ndeshje më pak, Barcelona ka 69 pikë në vend të dytë, e Atletiko vjen e treta, me 61 pikë. /tesheshi.com/
