Minarja e Xhamisë së Et’hem Beut në zemër të Tiranës, për pak sa nuk u përfshi dhe ajo në debatet klasike politike me akuza e kundërakuza, e kjo për shkak të një vije që dikujt iu duk si krisje. \
Ka qenë një arkitekte, Dorina Musai, ajo e cila u bë shkak që “minarja e krisuar” të bënte xhiron e rrjeteve me turlilloj akuzash, aludimesh e komentesh.
“Sot Xhamia e Et’hem Beut, e ndodhur midis dy ndërtimeve masive me disa kate nëntokë – parkimi dhe bazamenti i kullës 21 katëshe- është në rrezik eminent. Sikundër Kulla e Sahatit, edhe kulla e Minares, janë viktimat e epërsisë së betonit ndaj ndërtimit të shekujve të kaluar. Me shumë mundësi ka lëvizur i gjithë bazamenti i xhamisë, aspak e habitshme të ketë ndodhur nga lëvizja e pilotave të skarpatës së kullës. Lajmi i keq është se pilotat do vazhdojnë të lëvizin… Lajmi i mirë është se një dite- pas disa vitesh- do mbarojë lëvizja se strukturës së betonit të 24 katëshit. Deri atëherë nuk dihet a do rezistojë kulla e minares së xhamisë. Dy foto, njëra e bërë me herët nga unë, tjera e qarkulluar sot në rrjet…”, shkroi Musai .
Reagoi menjëherë enti që merret me restaurimin, më saktë drejtoresha e Institutit Kombëtar të Trashëgimisë Kulturore, Arta Dollani, sipas së cilës nuk bëhet fjalë për krisje por mbetje silikoni.
“Nuk bëhet fjalë për krisje, por për mbetje silikoni nga çatia mbrojtëse. Restaurimi vazhdon edhe do të pastrohet në vijim”, shkroi ajo.
Reagoi më pas dhe kryebashkiaku Veliaj, pasi mallkimet politike të krisjes së pretenduar ranë mbi të, duke shkruar:
“Silikoni i vendosur mes çatisë provizore per punimet e restaurimit dhe minares se xhamise eshte pastruar në pak minuta. As ka krisje, as ka shembje”, shkroi njeriu nr,1 i kryeqytetit, që më pas shton me ironi e nervozitet politik: “Këtu po kriset një parti në 5 copa që mundohet të panikosë besimtarët me mastik, dhe po shembet një rrjet portalesh gjobash! TURP”, shkruan Veliaj.
Kujtojmë se restaurimi i Xhamisë së Et’hem Beut po zgjat më shumë se dy vjet, po shkon gati tre, dhe është pjesë e një projekti të TIKA-s turke. /tesheshi.com/
