Përgjatë 85 sezoneve të zhvilluara në kampionatin spanjoll, Real Madrid është skuadra që ka goditur më së shumti penalti, ndërkohë Valencia më së shumti e dëmtuar në këtë aspekt.
Pavarësisht se janë klubi që kanë goditur më së shumti penalti, madrilienët janë në mesin e dhjetë skuadrave ndaj të cilave janë akorduar më së shumti penalti.
Një hulumtim i qendrës së historisë dhe statistikave në kampionatin spanjoll, tregon se tre nga katër penalti janë konvertuar në gol. Meksikani Hugo Sanchez është futbollisti që ka goditur më së shumti penalti, ndërkohë Andoni Zubizarreta është gardiani që ka pritur më së shumti penalti, së bashku me brazilianin Diego Alves.
Që nga sezoni 1928/29, kur ka filluar kompeticioni zyrtarisht dhe deri më tani në sezonin 2015/16, janë akorduar 6,514 penalti, ndërkohë 4,830 kanë përfunduar në rrjetë (74,15 %). Në çdo tre penalti, dy janë akorduar në favor të skuadrës vendase (65,15 %) dhe 34,85 % në favor të skuadrës mysafire.
Skuadrat e mëdha e kryesojnë ranklistën
Real Madrid është skuadra që ka goditur më së shumti penalti, gjithsej 487. Më pas vijnë Barcelona (460), Atletico Madrid (437), Valencia (414), Athletic Bilbabo (373), Espanyol (353), Sevilla (350), Real Sociedad (285), Zaragoza (276) dhe Betis (230).
Ndërkohë, Valencia kryeson listën e skuadrave ndaj të cilave u janë akorduar kontra penaltitë.
Ndaj lakuriqëve janë gjykuar 360 penalti, e ndjekur nga Espanyol (358), Athletic Bilbao (342), Barcelona (332), Sevilla (331), Atletico de Madrid (287), Real Sociedad (286), Zaragoza (278), Real Madrid (267) dhe Racing de Santander (250).
Hugo Sanchez, ekzekutoi më së shumti penalti
Lista e futbollistëve që kanë ekzekutuar më së shumti penalti kryesohet nga meksikani Hugo Sanchez, që ka goditur 71 penalti, nga të cilat 56 i ka transformuar në gol. Cristiano Ronaldo është futbollisti i dytë që ka ekzekutuar më së shumti penalti. Portugezi 52 herë është gjendur përballë me portierin nga pika e bardhë nga të cilat në vetëm pesë raste ka dështuar, njësoj sikurse holandezi Ronald Koeman, megjithëse ish futbollisti i Barcelonës, ka dështuar në gjashtë raste.
Alves, mace e penaltive
Diego Alves është gardiani që ka pritur më së shumti penalti. Statistikat e tij janë mbresëlënëse, pasi braziliani ka pritur një 11 metërsh në 44 % të rasteve. Ai pasohet nga Ignacio Eizaguirre (28), Vicente Biurrun (27) dhe Andres Palop së bashku me Jose Manuel Sempere (26).
Mestalla është stadiumi në të cilin janë akorduar më së shumti penalti, gjithsej 429. Eduardo Iturrale Gonzalez është gjyqtari që ka akorduar më së shumti penalti, gjithsej 104. Ndërkohë, më së shumti penalti në një ndeshje janë akorduar më 19 maj të vitit 1966, gjithsej 6. Ishte dueli ndërmjet skuadrave Oviedo-Valladolid , që përfundoi 3-8./tesheshi.com/
