Madrilenët nuk shfrytëzojnë edhe njëherë tjetër rrëshqitjen e Barcelonës, pavarësisht se dy herë e kishin epërsinë në duart e tyre në takimin ndaj Valencia-s në transfertë. Mirëpo në të dy rastet “lakuriqët” përmbysën gjithçka, duke ia pamundësuar kështu skuadrës së Rafa Benitez-it t’u afrohet dy ekipeve kryesuese, Atletico Madrid-it dhe Barcelona-s.
Tekniku spanjoll, Benitez, u prit ngrohtë në “Mestalla”, në stadiumin ku filloi historinë e suksesit si
trajner, mirëpo aventura e rikthimit të tij nuk doli të jetë ashtu siç e kishte menduar. Megjithëse “mbretërit” e nisën në mënyrë të shkëlqyer ndeshjen, duke realizuar me Benzema-në pas një aksioni model, të ndërtuar me Bale-n dhe Ronaldo-n. Por gjithçka u prish kur Pepe shkaktoi penallti në minutën e fundit të pjesës së parë, me ç’rast Parejo e ktheu në gol, për të vënë baraspeshën e fillimit të ndeshjes.
Pjesa e dytë e lojës nisi me mysafirët në aksion, që kërkonin me çdo kusht golin e epërsisë. Ama punët u vështirësuan tej mase për ta pas nxjerrjes me karton të kuq të Kovaçiç-it në minutën e 68-të. Përkundër të gjitha pengesave, miqtë nga Madridi ia dolën ta realizojnë golin e dytë me anë të uellsianit Gareth Bale. Gëzimi zgjati fare pak për madrilenët, pasi pak çaste më vonë, në minutën e 83-të, vendasit gjejnë rishtas barazimin me golin e shënuar nga Paco Alcacer.
Minutat e fundit të ndeshjes ishin histori më vete. Dy skuadrat patën mundësi të arta për të marrë gjithçka nga kjo ndeshje, por Negredo-n e Valencia-s dhe Bale-n e Real-it i tradhtuan këmbët në momentin e fundit, me sfidën të mbyllur kështu 2-2.
Real Madrid-i mban përsëri vendin e tretë në klasifikimin e kampionatit spanjoll, me 37 pikë, pas këtij barazimi, kurse Valencia pozicionohet në të dhjetin, me 23 pikë. /tesheshi.com/
