Reali i Madridit është shumë pranë finales së katërt në pesë vite në Champions League, me synimin e qartë për ta fituar për të tretin sezon rresht trofeun.
Mbase nuk është e njëjta skuadër aq bindëse sa në dy sezonet e shkuara, por kur vjen puna për në Champions, madrilenët e dinë mirë si fitohet.
Siç fituan 1-2 ndaj Bajernit të Mynihut në “Allianz Arena”, në gjysmëfinalen e parë. Edhe pse vuajtën disi në mbrojtje, spanjollët u treguan klinikë në rastet e tyre, duke përmbysur dhe disavantazhin.
Bavarezët morën epërsinë në minutën e 28-të, me një gol të Kimmich, por Marcelo ktheu barazpeshën në fundin e pjesës së parë me një goditje spektakolare. Asensio la sërish gjurmë me të hyrë në lojë në pjesën e dytë. Goli i tij i minutës së 57-të i dha fitoren Realit.
Pavarësisht triumfit, lojtari kyç i Realit, Ronaldo, ishte në një natë jo të mirë, aq sa nuk do ta godiste asnjëherë portën kundërshtare. Portugezi nuk ia doli për herë të parë që nga maji i 2017-s që të shënonte në një ndeshje të Champions League-s; shterpësia e tij në këtë ndeshje i dha fund një serie prej 11 ndeshjesh ku ai ka shënuar.
E për Realin, kjo ishte fitorja e 150-të në Champions League, një shifër e arritur vetëm nga madrilenët. Gjashtë janë fitoret e njëpasnjëshme në Champions League ndaj Bajernit të Mynihut, dhe tre të tilla janë në “Allianz Arena”. Reali i Madridit dhe Bajerni i Mynihut janë ndeshur 25 herë në Champions League, dhe skuadra e kryeqytetit spanjoll ka tani 12 fitore karshi 11 humbjeve e dy barazimeve.
Gjysmëfinalja e dytë mes këtyre dy skuadrave do të luhet të martën e ardhshme, më 1 maj. /tesheshi.com/
