Kryesuesit e kampionatit spanjoll dhe gjerman takohen për herë të dytë brenda një jave për të përcaktuar një prej gjysmëfinalistëve të Champions League-s të këtij sezoni.
Madrilenët zbresin në fushë me epërsinë e fitores 1-2 në ndeshjen e parë në fushën gjermane; përndryshe, bavarezët do të bëjnë çmos për ta kthyer situatën në favor të tyre e për t’u kualifikuar.
Mungesa e madhe te Reali i Madridit do të jetë uellsiani Gareth Bale, që pritet të zëvendësohet nga Isco. Do të mungojë gjithashtu dhe Pepe, me probleme fizike. Pikëpyetjet te Bajerni janë për formën fizike të Jerome Boateng-ut dhe Javier Martinez-it, ndërkohë që Lewandowski dhe Hummels kërkojnë të lënë mënjanë lëndimet e tyre.
Po ç’mendojnë trajnerët respektivë për ndeshjen e kësaj mbrëmjeje?
“Rezultati i takimit të parë nuk është përfundimtar, kështu që na duhet të bëjmë një tjetër ndeshje të madhe. E dimë se Bajerni po ashtu do të bëjë një ndeshje të madhe. Sfida do të vendoset nga detaje të vogla, dhe ne duhet të jemi gati,” është shprehur tërë kujdes Zinedine Zidane.
“Detajet e vogla e përcaktuan takimin e parë, prandaj duhet të përqendrohemi në to. Kemi një mundësi më të vogël se në ndeshjen e parë, por mund ta fitojmë këtë,” janë fjalët e Carlo Ancelotti-t.
Në faqen elektronike të Eurosport-it jepen një varg statistikash në lidhje me këtë ndeshje, ku veçohet fakti se Reali i Madridit ka arritur në gjysmëfinale të aktivitetit në të gjashtë sezonet e shkuara. Madrilenët kanë shënuar në të 34 ndeshjet e fundit në Champions League të luajtura në “Santiago Bernabeu”, e se së bashku me Juventusin janë dy ekipet e vetme që nuk e njohin humbjen në këtë sezon.
Sa për Bajernin e Mynihut, që kërkon sonte medoemos një fitore për t’u kualifikuar, Eurosport kujton se bavarezët i kanë humbur tetë nga dhjetë ndeshjet e fundit të luajtura në fushën e Realit në të gjitha aktivitetet. Fitorja e fundit e Bajernit të Mynihut në “Santiago Bernabeu” është e majit të 2001-shit, me një gol të Elber-it. /tesheshi.com/
