Kreu i Bashkisë, Erion Veliaj ka vizituar para pak momentesh tre efektivet e policisë që ndodhen të shtruara në Spitalin e Traumës, nga ku deklaroi se ndërtimet tek parku i liqenit do të vijojnë si dhe ka paralajmëruar procedime penale për ata anëtarë të PD që janë përplasur me efektivë të policisë bashkiake dhe asaj të shtetit.
Veliaj deklaroi se është e papranueshme që politikanët që fëmijët e tyre i rrisin në Hollandë drejtojnë protestat dhe dhunojnë policë. Duke iu referuar kreut të PD-së, Lulzim Bashës, Valiaj tha se ata besojnë që Amsterdami është më i mirë se Tirana, ndaj vendosin t’i çojë fëmijët në Amsterdam.
“Mjafton të shikosh deputetët vandalë e të armatosur të PD për të kuptuar se çfarë diference ka mes dritës dhe errësirës. 1 qershori do të vijë shumë shpejt dhe do të shikojmë në fund fare rezultatin e gjithë kësaj. Jam i sigurt që sot nuk ka asnjë shqiptar që thotë: “Kur të rritet fëmija im, do zoti bëhet si Strazimiri, me armë në brez”. Deputeti Çim Babasi që është sot në komisariat, është një ndër të parët që i është prishur interesi personal me ndërtimin e këtij parku”, – tha ndër të tjera kryebashkiaku Erion Veliaj. /tesheshi.com/
