Një nga liderët më të lartë të Europës akuzoi ish-kryebashkiakun e Londrës, Boris Johnson, se vuan nga “amnezia politike” e hedh “argument absurde”, pasi ky i fundit i krahasoi qëllimet e Bashkimit Europian me ato të Hitlerit.
Institucionet europiane deri më tani kanë shmangur përfshirjen në fushatën e egër për referendumin në Britaninë e Madhe, por presidenti i Komisionit Europian tha se ndjeu detyrimin të përgjigjej kur dëgjoi se BE-ja po krahasohej me planet e liderit nazist.
“Kur dëgjova që BE-ja po krahasohet me planet dhe projektet e Adolf Hitleri,t nuk mund të qëndroja në heshtje. Argumente të tilla absurde do të duhej të injoroheshin plotësisht nëse nuk do të ishin formuluar nga një prej politikanëve me më shumë ndikim në partinë qeverisëse të Britanisë së Madhe.”
“Boris Johnson kaloi kufijtë e diskursit racional, duke shfaqur amnezi politike. Këto pikëpamje ishin në mendjet e shumë europianëve, jo vetëm të britanikëve,” shtoi Tusk, “por kjo nuk përbën një justifikim për ‘verbërinë e rrezikshme’ të Johnson-it.”
Ish-kryebashkiaku i Londrës, që shihet si figura drejtuese e fushatës që propagandon largimin e Britanisë së Madhe nga Bashkimi Europian, shkaktoi zemërim kur bëri krahasimin mes BE-së dhe nënshtrimit nazist të Europës.
Në një intervistë në Sunday Telegraph, Johnson tha se Hitleri dhe Napoleoni kishin bërë përpjekje të dështuara për unifikimin europian dhe se BE-ja “ishte një përpjekje për ta bërë një gjë të tillë me metoda të ndryshme”.
Më pas Johnson u qëndroi komenteve të veta, duke e përshkruar reagimin ndaj tyre si një “stuhi artificiale cicërimash të medias”.
Tusk, ish-kryeministër i Polonisë, drejton samitet e liderëve të BE-së, dhe ka qenë një nga arkitektët e marrëveshjes së “statusit special” të Britanisë me BE-në, të siguruar nga David Cameron në muajin shkurt.
Tusk hodhi poshtë argumentet që sillen më shpesh nga fushatuesit e Brexit-it, duke thënë se BE-ja ishte një mjet i përbashkët, e jo një supershtet. “Vendet europiane do të duhej të përballnin të vetme krizën e refugjatëve, një Rusi agresive dhe pasigurinë ekonomike nëse nuk do të ishte për BE-në,” tha ai.
“Sot, ne më në fund kemi nisur t’i kujtojmë vetes për këtë të vërtetë banale dhe ndoshta të mërzitshme: e vetmja alternativë ndaj BE-së është kaosi politik, rikthimi në egoizmat nacionalë, dhe për pasojë, triumfi i tendencave antidemokratike, që mund të bëjnë që historia të përsërisë veten.”
Komentet e Johnson-it kanë nxitur mosbesim edhe në Gjermani. Një zëdhënës i Partisë Socialdemokrate tha se, “kishte mbetur pa fjalë se çfarë mund të nxjerrë nacionalizmi i marrë edhe nga njerëz që duken inteligjentë”.
Përgatiti: Juli Prifti – /tesheshi.com/
