Zëdhënësi i Pentagonit ka dhënë sqarime në një konferencë shtypi për komentet e gjeneralit Joseph Votel vetëm pak orë pasi presidenti turk e kritikoi ashpër qëndrimin e tij, ashtu si dhe fjalët e thëna.
Peter Cook deklaroi se drejtuesi i Komandës Qendrore të SHBA-ve ishte keqkuptuar kur ai i kishte komentuar ngjarjet e fundit në Turqi.
“Çdo raportim që sugjeron se gjenerali Votel shprehu mbështetje në një mënyrë për veprimet e oficerëve ushtarak turq që ndërmorën një veprim ilegal ushtarak kundër qeverisë turke janë në të vërtetë të pasakta,” tha Cook.
Homologët ushtarakë turq dhe amerikanë janë në një komunikim të rregullt të përditshëm, vuri në pah zëdhënësi i Pentagonit, duke dashur të theksojë se gjithçka funksionon normalisht mes dy partnerëve.
“Shtetet e Bashkuara e kanë dënuar në mënyrë të përsëritur puçin e dështuar në Turqi, dhe ne vazhdojmë të përcjellim mbështetjen tonë absolute për institucionet demokratike dhe për qeverinë civile turke të zgjedhur demokratikisht,” ka shtuar ai.
Gjenerali Joseph Votel do të reagonte po ashtu me një deklaratë të shkruar pas qortimit të ashpër që Erdogani u bëri komenteve të tij.
“Çdo raportim se unë kam patur të bëj me përpjekjen e fundit të pasuksesshme për grusht shteti në Turqi është për të ardhur keq dhe plotësisht i pasaktë,” thuhet në këtë deklaratë.
“Turqia ka qenë për shumë vite një partner i jashtëzakonshëm dhe jetik në rajon. Ne e çmojmë bashkëpunimin e vazhdueshëm të Turqisë dhe vështrojmë me shpresë në partneritetin tonë të ardhshëm në luftën kundër ISIS-it,” vijon deklarata e gjeneralit amerikan.
Votel do të deklaronte të enjten se arrestimet në masë të komplotuesve të puçit mund t’i dëmtonin marrëdhëniet midis dy forcave ushtarake, çka solli reagimin e papërmbajtur të presidentit turk ditën e djeshme. /tesheshi.com/
