Nuk kanë vonuar reagimet e shtetarëve por edhe të figurave të njohura politike në botë në lidhje me aktin terrorist të Nicës, me emërues të përbashkët të tyre mbështetjen e dhënë Francës në këtë moment.
Presidenti amerikan, Barack Obama, e ka dënuar nëpërmjet një deklarate atë që ai e shihte të ngjante një “sulm i tmerrshëm terrorist”.
“Ne qëndrojmë në solidaritet dhe në partneritet me Francën, me aleatin tonë më të vjetër, ndërsa ata i përgjigjen këtij sulmi dhe e marrin veten prej tij. Ne kemi ofruar çdo ndihmë që mund t’u nevojitet për ta hetuar këtë sulm dhe për t’i vënë përgjegjësit para drejtësisë.”
“Gjermania qëndron në krah të Francës në luftën kundër terrorizmit,” ka thënë kancelarja gjermane Angela Merkel. “Jam e bindur se ne do ta fitojmë këtë luftë, pavarësisht vështirësive.”
Donald Tusk, presidenti i Këshillit Europian, do të shprehej kështu për ngjarjen: “Eshtë një paradoks tragjik që viktimat e sulmit ishin njerëz që po festonin lirinë, barazinë e vëllazërinë. Ne do të qëndrojmë të bashkuar me familjet e viktimave, me popullin e me qeverinë franceze në luftën kundër dhunës dhe urrejtjes.”
“Anëtarët e Këshillit të Sigurimit e dënojnë fuqimisht sulmin terrorist barbar e burracak.” Kështu thuhet mes të tjerash në një deklaratë të Këshillit të Sigurimit të OKB-së.
Ministri i Jashtëm belg, Didier Reynders, pati si reagim këto fjalë, “Ne e dënojmë një sulm të tillë, mbase një sulm terrorist, por përsëri një sulm i tillë në Francë.”
Hillary Clinton, kandidatja e mundshme demokrate për zgjedhjet presidenciale në SHBA, është shprehur kësisoj: “Edhe një herë duket se terroristët kanë goditur një prej aleatëve tanë më të ngushtë në Europë, duke sulmuar familje që kremtonin historinë dhe kulturën e vendit të tyre në Ditën e Bastijës.”
“Kanadezët janë të tronditur nga sulmi i kësaj mbrëmje në Nicë. Solidariteti ynë është me popullin francez.” Eshtë ky reagimi i kryeministrit francez, Justin Trudeau. /tesheshi.com/
