Presidenti Thaçi reagoi për herë të parë ndaj akuzave të lëshuara prej tij nga ish-kryemininistri Berisha, i cili, lidhur me idenë e korrigjimit të territoreve, e ka etiketuar Thaçin si “argat të Beogradit”.
Gjatë një interviste në “5 Pyetje nga Babaramo” në A1 Report, Presidenti kosovar ka kujtuar ca kohë të shkuara të bashkëpunimit me Berishën, duke e lidhur këtë qëndrim të tijin sot më shumë si një hatërmbetje politike prej raporteve të tij me Ramën, sesa me meraqe kombëtare.
“Kam bashkëpunuar shumë mirë si kryeministër, duke vrapuar bashkë me Berishën nëpër fshatrat më të thella të Dukagjinit duke folur për bashkim kombëtar. Kemi pasur një bashkëpunim produktiv, për interesin e shtetit të Kosovës dhe të Serbisë. Madje kam marrë pjesë edhe në fushatën elektorale të Berishës, duke marrë pjesë në hapjen e tunelit në Kalimash. Edhe në takime të tjera.
Nuk kam parë ndonjë zemërim në atë kohë nga z. Rama, për arsye se edhe unë isha kryeministër edhe ai ishte kryeministër. Edhe kryeministri Berisha në atë kohë ka qenë në ceremoninë e hapjes së segmentit të autostradës së Kosovës”, tha Thaçi.
Ndërsa në pyetjen nëse ai do pranonte një debat me Berishën, kreu i shtetit të Kosovës gjeti rastin t’i kujtojë politikanit të njohur të Tiranës se dikur kish qenë ai ndihmës i Millosheviçit, referuar shkeljes së embargos ndaj Serbisë.
“Unë nuk jam nga bota shpellare apo e njerëzve që thërrasin për mejdan kanunor, por për ballafaqim idesh jam i gatshëm me secilin, në secilën studio, le të zgjedhin secilin gazetar dhe të diskutojmë për të gjitha çështjet që janë për t’u diskutuar, por natyrisht në fund të jetë një debat i civilizuar, jo i sulmeve, jo i etiketimeve.
Unë nuk sulmoj dhe nuk etiketoj. Nuk dua të komentoj dhe nuk dua që të merrem me deklarimet individuale të askujt.
Në veçanti dëshiroj të kem debat me njerëzit që kur unë e kam luftuar Milosheviçin, ata e kanë ndihmuar Milosheviçin”, tha Thaçi.
Duke sqaruar dhe njëherë idenë e tij të korrigjimit të territoreve, Thaçi deklaroi se asnjë centimetër i Kosovës nuk i kalon Serbisë e aq më tepër pasurite.
“Nuk do të ketë kufij me baza etnike. Kosova do tëjetë multietnike, Serbia do të jetë multietnike. Nuk do të ketë cenim të pasurive shtetërore të Kosovës. Trepça ka qenë dhe do të mbetet gjithmonë pronë e Kosovës. Edhe bashkimi i qytetit të Mitrovicës do të ndodhë. Edhe Ujmani ka qenë dhe do të mbetet pronë e Kosovës.
Unë e kam vizituar dhe njerëzit mendojnë se kam shkuar për të shëtitur. Jo. Ka qenë mesazh i qartë që ai që e prek Ujmanin, prek kombin shqiptar. Dhe nuk ndahet mirë”, shtoi Thaçi.
Ndërsa sa i përket taksës ndaj Serbisë, Thaçi tha se ishte një masë që Beogradi e meritonte, porse tani duhej rishikuar për shkak të presionit amerikan, por dhe të faktit se taksa kishte nxituar hyrjen e mallrave kontrabandë nga Serbia në Kosovë.
“Nuk duhet që për shkak të armiqësisë me Serbinë të cenojmë raportet strategjike me SHBA-të. Pra, për asnjë taksë nuk duhet të cenojmë miqësinë e përjetshme me SHBA-të, në një formë apo një formë tjetë. Ne të gjithë duhet ta kuptojmë se SHBA-të janë hisedarë në lirinë dhe në pavarësinë e Kosovës.
Ato kanë luftuar për lirinë e Kosovës, për çlirimin e Kosovës. Janë sot prezent në Kosovë. Kanë investuar dhe shpenzuar me miliarda e miliarda, kanë qendrën ushtarake në Kosovë, më të fuqishmen në rajon. Kështu që këto këshilla, mendoj që duhet të merren seriozisht.
E theksova se as partnerë e miqtë tanë, as armiqtë tanë nuk e kanë menduar që do të vinte një ditë kur Kosova do t’i thoshte ‘jo’ këshillës së SHBA-ve”, deklaroi Thaçi. /tesheshi.com/
