Agron Tufa, drejtori i një institute që heton krimet e komunizmit, instancë e re në varësi të Kuvendit të Shqipëri, i përcolli një mesazh publik kryeministrit Rama, një ditë pasi ky i fundit, në një takim me veteranë në kuadër të 5 Majit, deklaroi se “…në pikëpamje të luftës për çlirim deri në 29 nëntor 1944 nuk mund të jetë objekt i një instituti që paguhet me taksat e shqiptarëve. Çfarë erdhi pas ka qenë objekt i punës së atij instituti dhe i takon Kuvendit që të bëjë vlerësimet e nevojshme në raport me ligjin apo shkeljen e ligjit…”.
Duke iu referuar kësaj fraze, Tufa, tenton t’i kujtojë shefit të qeverisë se sipas tij, ai po tentohet të gënjehet, nga ata që Tufa shkrimtari i njohur, i quan “enveristë përreth tij”
“Kryeministri i Shqipërisë, z. Edi Rama, nuk duhet t’u zërë besë as enveristëve përreth tij, që e gënjejnë kaq vrazhdë e trashë në lidhje më periudhën që ligji i jep në shqyrtim ISKPK; nuk duhet të më zërë besë as mua, që mund të kem “konflikt interesi” në këtë çështje. A ka punë më të thjeshtë e më të pastër sesa të shohësh vetë ligjin nr.10242 për Institutin e Studimeve të Krimeve dhe Pasojave të Komunizmit”? Aty thuhet gjithçka qartë e shqip:
“a) “Periudha e komunizmit” është periudha e historisë së Shqipërisë nga 29 nëntori 1944 deri më 8 dhjetor 1990, si dhe periudha përpara datës 29 nëntor 1944, gjatë së cilës është zhvilluar veprimtaria, që ka përgatitur ardhjen në pushtet të Partisë Komuniste të Shqipërisë, e cila, më pas, u shndërrua në Partia e Punës e Shqipërisë”. (Neni 3, përkufizime, pika “a”), shkruan Tufa.
Por diku, ai zgjedh t’i kujtojë të parit të qeverisë diçka që ka të bëjë me të kaluarën e tij si anti-komunist simbol i ’90-ës, ndër më gjuhëashpërit, i cili konsiderohej dhe ai ekstremist dhe anarkist
“Dhe pikërisht në këtë mundësi që hap Ligji për të studiuar krimet e komunizmit edhe para 29 nëntorit 1944, ka vend (e them ndershmërisht) realizimi i një prej ideve antikonformiste të shprehura në fillim të viteve ’90 nga Kryeministri vetë, si ky citim pikant:
‘Duhet pranuar më në fund hapur, që lufta kundër okupatorit degjeneroi në një luftë të përgjakshme civile… shkaktare e së cilës ishte Partia Komuniste shqiptare e drejtuar nga emisarët jugosllavë’.
(‘Refleksione’, Shtëpia botuese ‘Albania’, Tiranë 1992, f. 180-181).
Asokohe unë isha student i Letërsisë në Filologjik, i dehur me lirinë dhe miqtë e grupit poetik ‘E për-7-shme’, mendoja se komunizmi dhe enverizmi kishin rënë, vdekur pëfundimisht. Nuk ia vlente të merreshe përveçse me art, poezi e karagjozllëqe të moshës. Por ‘Refleksionet’ dhe gazetën ‘Albania’ të Ramës dhe Klosit si dhe publicistikën ala kubofuturiste të Ramës, e lexonim me qejf, sidomos çmitizimin e tabuve, ndër to dhe të luftës së kanonizuar sipas biblës së kuqe enveriste”, shkruan Tufa në mesazhin e tij drejtuar Ramës.
Dhe në fakt, Rama është ndër të parët, në mos i pari që hodhi tezën se nacionalçlirimtarja qe, veç të tjerash, edhe një luftë civile.
Përpos kësaj, Rama kërkonte nxjerrjen jashtë ligjit të Partisë së Punës, e cila u shndërrua më vonë në Parti Socialiste, kreu i së cilës do qe shumë vite më vonë, siç dhe është.
Kujtojmë se kohët e fundit, shkrimtari Tufa dhe disa zëra të lidhur direkt ose indirect me ish-regjimin, janë përplasur për “të vërtetat” e luftës, e kjo pasi Tufa, në krye të Institutit për të kaluarën komuniste, ka publikuar dokumenta kompromentues mbi ngjarjet e luftës. /tesheshi.com/
