Prokurorja e Përgjithshme e përkohshme Arta Marku, ka reaguar ashpër pas publikimit në gjermanen Bild të një seti të ri përgjimesh nga Dosja 339, e cila ka si personazh krebashkiakun e Durrësit Vangjush Dako, i cili komunikon Avdulajt e Shijakut në kuadër të fushatës elektorale në zgjedhjet e vitit 2017.
Për Arta Markun, e gjitha ka ardhur nga prokurorë që kanë punuar politikisht për interesat e tyre, duke nxjerrë sekretin hetimor.
“Prokurori i Përgjithshëm ndjehet i indinjuar që në radhët e prokurorisë akoma militojnë prokurorë apo punonjës të tjerë që janë gati që për interesa të vogla personale të bëjnë pazar me çdo dosje penale duke kontaminuar opinionin publik me informacione të pahetuara dhe të paverifikuara nga ata vetë si autoritete përgjegjëse për hetimin dhe verifikimin e tyre”, thuhet në një deklaratë të Kryeprokurores Arta Marku.
Sipas saj, Dosja 339 duhet hetuar urgjentisht, me qëllim që mos spekullohet më me të.
“Duke marrë shkas nga publikimi i disa materialeve të përgjimit në gazetën gjermane Bild, Prokurori i Përgjithshëm njofton opinionin publik se po ndjek cështjen me shumë vëmendje dhe ashtu siç ka kërkuar edhe më përpara, kërkon dhe u bën thirrje prokurorëve që kanë në hetim çështjet 339 dhe 184, si autoritetet e vetme në ushtrimin e ndjekjes penale për këto çështje, që të hetojnë dhe të zgjidhin pa humbur kohë këto çështje, duke vënë para përgjegjësisë penale këdo që ka konsumuar një vepër penale. Ky është jo vetëm detyrim kushtetues dhe ligjor, por edhe një detyrim publik për të bërë të qartë cfarë ka ndodhur me këto çështje dhe çfarë kanë ato në përmbajtje”,shprehet znj.Marku.
Gruaja në krye të Prokurorisë së Përgjithshme, kërkon të hetohet se kush prej vartësve te Krimet e Rënda ka nxjerrë përgjimet në publik.
“Prokurori i Përgjithshëm i bën thirrje prokurorisë kompetente që të hetojë me shpejtësi nxjerrjen në publik të akteve që përbëjnë sekret hetimor dhe të vihet para përgjegjësisë penale kushdo, prokuror, oficer i policisë gjyqësore apo dikush tjetër që ka poseduar për shkak të ligjit CD-të dhe në vend që të ushtronte funksionet ligjore dhe të kryente hetimin objektiv, ka bërë publikimin e tyre.
Prokurori i Përgjithshëm njofton opinionin publik se ka filluar një verifikim administrativ të mënyrës sesi kanë lëvizur CD-të dhe DVD-të, si dhe cdo material tjetër përgjimi, nga Zyra e Përgjimeve në Prokurorinë e Përgjithshme, në drejtim të Prokurorisë së Krimeve të Rënda.
Gjithashtu, Prokurori i Përgjithshëm, në zbatim të kompetencave aktuale njofton opinionin publik se ka miratuar udhëzimin nr.4, dt.26.10.2018 “Për përgjimet” ku përcaktohen në detaje rregullat për ruajtjen e sekretit të përgjimit. Nxjerrja e sekretit ka ardhur jo si pasojë e mungesës së ligjeve apo akteve nënligjore dhe administrative, por për arsye të tjera larg çdo norme ligjore apo morale”, përfuodn deklarata e Kryeprokurores së përkohshme Arta Marku. /tesheshi.com/
