Siç pritej dhe siç ishte paralajmeruar, presidenti Meta nuk e ka kursyer as Komisionin e Venecias, një ndër instancat më prestigjoze të jurispundencës në botë, e cila ofron këshillime për çështje konsitucionale, duke ia vënë në diskutim këtë aftësi. Kjo, pasi ky komision, e nxorri në faj kreun e shtetit shqiptar, duke u shprehur se ka shkelur Kushtetutën në rastin e anullimit të zgjedhjeve të 30 qershorit, e se kjo datë zgjedhjesh ishte legjitime.
Duke e renditur me pika oponencën e tij, në një letër dërguar Gianni Buquiçhios, President i Komisionit të Venecias, Meta e quan opinionin e këtij komisioni si kontradiktor.
“Projekt-opinioni është shpeshherë kontradiktor, me vlerësime diametralisht të kundërta për të njëjtën çështje. Krijohet përshtypja se ekspertët e Komisionit të Venecias janë udhëhequr apriori nga disa ide fikse duke bërë që faktet dhe analiza të mos kenë përputhje racionale me konkluzionet e projekt-opinionit”, e nis Meta oponencën e tij.
Madje kreu i shtetit shqiptar thotë se Venecia tejkaloi dhe kompetencat në dhënien e opinionit.
“Projekt-opinioni nxjerr disa konkluzione që tejkalojnë mandatin e Komisionit të Venecias si organ këshillimor, dhe për të cilat nuk është pyetur nga Kuvendi i Shqipërisë.
Vlerësimi i shkallës së rrezikut në Shqipëri duke u kufizuar në ballafaqimin e cunguar të deklaratave të autoriteteve publike është joprofesional dhe janë jashtë objektit të punës së ekspertëve të Komisionit të Venecias.
Gjithashtu ekspertët në disa raste kanë tejkaluar kompetencat e tyre këshillimore, duke i veshur vetes atributet e gjykatësit”, shprehet Meta.
Ai arrin deri aty se të thotë se “Projekt-opinioni dhe mënyra se si është ndërtuar, rrezikon krijimin e një precedenti problematik për një rend shoqëror demokratik.
Nëse ky projekt miratohet siç është atëherë çdo lider autokrat mund ta intepretojë këtë opinion të Komisionit të Venecias në favor të tij”, thotë Meta, duke çuar pra sinjalin se duhet ndryshuar qëndrim.
“Në emër dhe në respekt të aspekteve proceduriale, çdo lider autokrat do të frymëzohet për të shtyrë opozitat që të dalin jashtë sistemit, apo të pamundësojë me forma të fshehura pjesëmarrjen e tyre në zgjedhje, duke shkelur në themel të gjitha standardet thelbësore të zgjedhjeve në sistem demokratik, gjithmonë në emër të “respektimit” të procedurave të zhvillimit të tyre”, argumenton kreu i shtetit.
Më tej, për aspekte të thukëta juridike, Meta i drejton këto pyetje sfiduese kreut të Venecias:
“Përveç Presidentit të Republikës, cilit institucion tjetër i njeh Kushtetuta e Republikës së Shqipërisë të drejtën e caktimit të datës së zgjedhjeve?
A ka ndonjë Gjykatë në Republikën e Shqipërisë që ka urdhëruar shfuqizimin e Dekretit të Presidentit të Republikës nr.11199, datë 10.06.2019 dhe Dekretit nr.11211, datë 27.06.2019? A është Gjykata Kushtetuese e Republikës së Shqipërisë i vetmi organ që shqyrton kushtetutshmërinë e Dekreteve të Presidentit të Republikës?
A i është kërkuar Komisionit të Venecias të japë një opinion për vlerësimin e procesit të votimeve të 30 qershorit 2019? A është në kompetencën e Komisionit të Venecias vlerësimi i zgjedhjeve lokale në Shqipëri? A vendos një vlerësim i ndryshëm nga OSBE/ODIHR mbi procesin zgjedhor një precedent përplasjeje midis institucioneve ndërkombëtare? A i ka kërkuar Komisioni i Venecias opinion Kongresit të Autoriteteve Lokale mbi vendimin për mosdërgimin e vëzhguesve për procesin zgjedhor të 30 qershorit në Shqipëri, duke patur parasysh se të dy këto institucione veprojnë nën suazën e Këshillit të Europës?”,janë disa nga pyetjet e Metës.
Tashmë duhet të pritet data 11 tetor, kur Komisoni i Venecias, duke marrë në konsideratë dhe këtë kundërshti të presidentit shqiptar, duhet të japë verdiktin përfundimtar.
Dhe nuk besohet se do pranojë të sfidohet profesionalisht nga Meta. /tesheshi.com/
